Fer úr stjórnmálum í baráttu háskólamanna

Þórunn Sveinbjarnardóttir var kjörin formaður Bandalags háskólamanna á dögunum og mun því láta af starfi framkvæmdastýru Samfylkingarinnar. Þórunn hefur mikla reynslu úr stjórnmálum og var meðal annars þingmaður og ráðherra. Hún telur að reynsla sín muni koma að gagni í nýja starfinu.

„Já, ég er þeirrar skoðunar, annars hefði ég ekki sóst eftir því og ég held að ég búi yfir ágætis reynslu og þekkingu. Bæði á stjórnkerfinu, samfélaginu, samfélagsmálum og margs konar pólitík. Meðal annars kjarapólitík,“ segir hún.

Þórunn var kjörin í embættið 22. apríl og á sama tíma var kosið í stjórn og öll trúnaðarembætti BHM. Páll Halldórsson, fráfarandi formaður og núverandi varaformaður, fer aftur á móti fyrir viðræðunefndinni í þeim kjaraviðræðum sem nú standa yfir og stýrir verkfallsaðgerðum. Þórunn tekur þátt í viðræðunum og vinnur með viðræðunefndinni.

„Tímasetningarnar eru bara svona og mér finnst nú að ég hafi áður litið í gin ljónsins þó að það hafi kannski verið aðrar aðstæður,“ segir Þórunn, spurð að því hvort hún sé ekki að kasta sér í gin ljónsins, nú þegar kjaraviðræður eru í svo miklum hnút. „Auðvitað er þetta snúin tímasetning og margt að gerast. Og ég þarf auðvitað að setja mig inn í mörg mál á stuttum tíma. En stundum eru aðstæður bara þannig að maður þarf að gera það,“ bætir Þórunn við.

Þórunn segir að aðdragandinn að því að hún gaf kost á sér sem formaður hafi verið þannig að hún var farin að horfa í kringum sig og hafði sett sér það markmið skipta um starf á þessu ári ef hún gæti. „Svo auglýsti BHM eftir formanni,“ segir hún. Þórunn er félagi í Fræðagarði, einu aðildarfélaga BHM, og gerði vart við sig. Fræðagarður ákvað því að bjóða hana fram sem sinn fulltrúa í formennsku og var Þórunn kjörin í embættið.

„Ég hef aldrei átt neitt einkalíf,“ segir Þórunn og hlær þegar blaðamaður spyr hana hvort hún muni eiga eitthvert einkalíf í nýju vinnunni. „Jú, jú, verður maður ekki að reyna það. Það er engin vinna svo mikilvæg að maður fórni öllu einkalífi. En auðvitað er það þannig að þegar mikið liggur við þá þarf maður stundum að láta vinnuna ganga fyrir,“ bætir Þórunn svo við af öllu meiri alvöru.

Þórunn á eina tólf ára stelpu, sem heitir Hrafnhildur, og þær eiga hund. Mæðgurnar eiga ýmis áhugamál. Þær fara saman í bíó, eru duglegar að ferðast og hafa líka gaman af því að sitja saman heima og lesa.