Spá 3,8 prósenta hagvexti á árinu

Hagstofa Íslands spáir því að hagvöxtur verði 3,8% á þessu ári og 3,2% árið 2016. Þetta kemur fram í Hagtíðindum sem komu út í dag.

Mikill vöxtur fjárfestinga og einkaneyslu er talinn drífa hagvöxt áfram næstu tvö ár. Árið 2015 er spáð að landsframleiðslan aukist um 3,8%, einkaneysla um 3,8% og fjárfesting um 18,1%.  Á árinu 2016 er gert ráð fyrir að landsframleiðslan aukist um 3,2%, einkaneysla um 3,3% og fjárfesting um 16,3%.

Þá gerir spáin ráð fyrir að hagvöxtur verði 2,5 - 2,8% árlega frá 2017 til 2019, einkaneysla aukist kringum 3% á ári á tímabilinu og að dragi úr vexti fjárfestingar.

Samneysla er talin aukast um 1,5 - 1,8% árlega 2015 - 2018 og lítið eitt meira árið 2019.

Verðbólgan áfram lág

Samkvæmt spánni verður verður verðbólga hér á landi 1,7% árið 2015 en mun svo aukast nokkuð og verði um 3% árið 2016 en lækki í 2,5% í lok spátímans.

Þó er bent á að verðbólga gæti orðið meiri á árinu ef launahækkanir verði meiri en 7%, líkt og gert er ráð fyrir í spánni.