Mikil vinna við að breyta verði

Mikil vinna er nú í ýmsum verslunum við að breyta öllum verðmerkingum í samræmi við breytingar á virðisaukaskattskerfinu sem tóku gildi um áramótin. Til að mynda eru teymi í öllum Hagkaupsverslunum að breyta merkingum á um 60 þúsund vörutegundum nú fyrstu daga ársins.

Öll verð breytast

Almennt þrep virðisaukaskatts lækkar úr 25,5 prósent í 24 prósent en það þýðir, samkvæmt ASÍ, verðlækkun upp á um 1,2 prósent. Í því þrepi eru til að mynda föt og skór, lyf, áfengi og tóbak, rafmagn til heimila, húsgögn, tölvur og prentarar, símtæki, bílar og tryggingar.

Neðra þrep virðisaukaskattsins hækkaði á sama tíma úr 7 prósent í 11 prósent. Samkvæmt ASÍ þýðir það verðhækkanir upp á um 3,7 prósent. Í því þrepi er matur, drykkur, bækur, dagblöð, geisladiskar, raforka til húshitunar, bleiur og smokkar, gistiþjónusta og veggjald í Hvalfjarðargöngin.

Vísir hefur í morgun rætt við ýmsar verslanir og þjónustufyrirtæki þar sem allir segjast vera að vinna við að uppfæra verðmerkingar eða að allt sé þegar klappað og klárt. Verðbreytingar hafa þegar átt sér stað í tölvukerfum allra þeirra fyrirtækja sem Vísir ræddi við, þar á meðal Hagkaup, BL og Elko.

Allt á fleygiferð í Hagkaupum

„Það er allt á fleygiferð í þessum töluðu orðum. Það eru teymi í hverri verslun fyrir sig sem er að ráðast til atlögu á allar hillur,“ segir Gunnar Ingi Sigurðsson, framkvæmdastjóri Hagkaupa. „Þar sem umfangið er talsvert í Hagkaup, með einhver 60 þúsund vörunúmer, þannig að þetta gerist ekki á núll einni, eins og þeir segja.“

Til marks um hversu umfangsmiklar breytingar þarf að breyta nokkur hundruð þúsund vörumerkingum. „Mér telst til að þetta séu fimm eða sex hundruð þúsund miðar sem við þurfum að skipta um,“ segir hann.

En skilar þetta sér til neytenda? „Já það er allt komið að fullu. Það er enginn afsláttur af því. Maður vitnar alltaf í virðisaukaskattslækkunina hérna um árið, þær komu allar inn í verðið. Okkar viðskiptavinir þurfa ekki að hafa neinar áhyggjur af öðru en að þetta fari beint í gegn.“ 

Mikill munur á sykri

Neytendur munu líklega finna mest fyrir breytingum á sykurvörum af þeim vörum sem finnast í hillum stórmarkaða. Sykurskattur var felldur niður í gær samhliða öðrum almennum vörugjöldum. Sykurskattur á kíló af sykri var 210 krónur og 21 króna af hverjum lítra af gosdrykkjum. 

Virðisaukaskattur á sykurvörur hækkar hinsvegar á sama tíma, sem dregur úr verðlækkunum sem nemur þeirri hækkun.

Niðurfelling vörugjalda hefur einnig talsverð áhrif á verð á stórum raftækjum. Þau voru í tveimur þrepum, 25 prósent og 20 prósent. Þau tæki sem voru í efra þrepinu, til dæmis sjónvörp og heimabíókerfi, lækka um 18 prósent en þau í lægra þrepinu, til að mynda þvottavélar, eldavélar og kæliskápar, lækka um 14 prósent.

Breytingar á vörugjöldum eru ekki enn komin fram í verði nema í nokkrum tilfellum. Það mun gerast á næstu dögum og vikum eftir því sem nýjar vörur, sem fluttar eru inn á þessu ári, koma í búðir.