Pabba-kroppurinn kremur þvottabrettið

Nú mega helskornir og líkamsræktaróðir karlmenn svo sannarlega fara að vara sig, því þvottabrettið er ekki lengur í tísku. Nýjasta trendið er nefnilega „dad bod“, eða pabba-kroppur. Eftir að ung bandarísk stúlka skrifaði grein um hversvegna stelpur elskuðu pabba-kroppana, hefur þetta æði farið eins og eldur í sinu um samfélagsmiðla.

Pabba-kroppurinn er mitt á milli þess að vera fitt og feitur. Pabba-kroppur fer í ræktina annað slagið, en leyfir sér að drekka bjór og borða pítsu með félögunum. Margir fagna þessu nýja trendi og segja að loksins sé það aðlaðandi að vera venjulegur. Kvenfólk virðist vera afskaplega hrifið af þessu útliti og segir meðal annars í greininni að þetta gefi stelpunum aukið sjálfstraust að sjá að þær séu í betra formi en strákurinn. Þeim finnist fínt til tilbreytingar að vera flottari aðilinn á myndum. Hver vill heldur kúra hjá gaur með eins stafs fituprósentu eða geta ekki farið á hamborgarastað á þriðjudegi, því það er ekki nammidagur?

Þó nokkrar stjörnur virðast aðhyllast þetta nýja æði, hvort sem það er viljandi gert eða hvað, og má þar helst nefna Leonardo DiCaprio, Chris Pratt, Russel Crowe, Jonah Hill, Simon Cowell og Jason Segel. Þetta trend virðist ekki vera bundið við einhvern einn aldurshóp því pabba-kroppurinn virðist vera jafn vinsæll hjá háskólastrákum og mönnum um fimmtugt.

Ekki eru þó allir sammála um ágæti þessarar nýju tísku, ef svo má kalla, og vilja meina að þarna gæti mikils ójafnréttis. Þarna sé verið að hvetja karlmenn til þess að vera náttúrulegir en á sama tíma sé samfélagið að þrýsta á konur að vera grannar og koma sér í form nokkrum dögum eftir barnsburð. Á Twitter fór kassamerkið #mombod á flug og þar gagnrýndu stelpur þessa nýju tísku. Þær sögðust meðal annars vera tilbúnar að samþykkja þetta nýja æði, um leið og það yrði samþykkt af samfélaginu að konur væru með smá hold utan á sér.