Svona kemstu í bæinn á Menningarnótt

Reikna má með því að tugir þúsunda ætli að skella sér í miðbæ Reykjavíkur á Menningarnótt og fagna afmæli höfuðborgarinnar. Ljóst er að ekki geta allir lagt einkabílnum á besta stað. Lögreglan verður á vaktinni en sekt vegna stöðubrota er komin upp í tíu þúsund krónur. Dýrt grín það.

Ókeypis verður í Strætó á morgun en akstursáætlun verður að mestu eins og aðra laugardaga. Tímatöflur verða þær sömu. Vegna lokana í miðborginni munu vagnarnir aka gömlu Hringbrautina gengt BSÍ ásamt því að aka til og frá Hlemmi þar sem allar venjulegar leiðir sem aka um miðbæinn munu stöðva.

Hefðbunda leiðarkerfið verður óvirkt klukkan 23 þegar megin áhersla verður lögð á að flytja gesti úr miðborginni og heim í hverfin sín. Síðustu ferðirnar verða eknar klukkan eitt eftir miðnætti. Nánari upplýsingar um leiðarkerfi Strætó á Menningarnótt má finna hér (PDF).

Einar Bárðarson, forstöðumaður Höfuðborgarstofu, segir öllu máli skipta að allir komist heim. Hann er vongóður um góða mætingu á hátíðina í ár þrátt fyrir rigningarspá, en segir fjöldann ekki skipta öllu máli, meira máli skipti að allir komist heilir heim og skemmti sér vel.

„Veðurspáin hefur nú aðeins verið að hrella okkur en ég á þó von á því að fólk skundi í miðborgina. Við búumst alltaf við mesta fjöldanum en erum ekki í talnakeppni. Það eru allir mælar búnir að bræða úr sér hvað varðar mætingu en það sem skiptir mestu er að allir komist heilir heim.“ 

Setningarathöfnin verður með sérstöku sniði í ár en hana setja ungt fólk sem á það sameiginlegt að hafa fæðst fyrstu menningarnóttina fyrir tuttugu árum. „Ég er svolítið spenntur að sjá andlit þeirra,“ segir Einar. Hann á von á að í kringum eitt hundrað þúsund manns muni mæta á fjölmennustu útihátíð landsins.

Fáðu skutl

Strætó verður með sérstaka skutluþjónustu á morgun fyrir þá sem vilja komast hratt og örugglega inn á hátíðarsvæðið. Skutlurnar munu ganga frá klukkan 12 frá bílastæði Íslandsbanka á Kirkjusandi með viðkomu á stoppustöðvum strætó í Borgartúni og þaðan upp að Hallgrímskirkju.

Leigubílar verða staðsettir við Hallgrímskirkju, Skúlagötu, BSÍ og á Túngötu við Landakotskirkju. Eftir klukkan 21 færast leigubílar við Skúlagötu yfir á Gömlu Hringbraut, við enda Njarðargötu.

Nánar um götulokanir og enn stærra kort hér.

Ferðaþjónusta fatlaðra

Aksturþjónusta Ferðaþjónustu fatlaðra verður með hefðbundnu sniði. Notendur eru beðnir um að bóka ferðir með góðum fyrirvara. Aðeins verður hægt að panta ferðir til og frá þremur stöðum:

• Bílastæðaplan við Tækniskólann á Skólavörðuholti
• Bílastæðaplan á horni Túngötu og Suðurgötu í nágrenni við Ráðhús Reykjavíkur
• Bílastæðaplan vestast á Skúlagötu, framan við Sjávarútvegsráðuneytið

Hægt verður að panta síðustu heimferð kl. 00.00. Viðbúið er þó að einhver seinkun kunni að verða sökum umferðar og álags.

Nánari upplýsingar á heimasíðu Menningarnætur.