Fjármagna útskriftarveisluna með krafti fjöldans

Félagarnir og frumkvöðlarnir Vignir Örn Guðmundsson og Marinó Valdimarsson ætla að halda heldur óhefðbundna útskriftarveislu í lok janúar, en þeir eru báðir nýúskrifaðir úr meistaranámi. Veislan verður fjármögnuð með krafti fjöldans og afþakka þeir því allar gjafir.

Veislan verður sérsniðin að sameiginlegum markmiðum sem munu ákvarða hverjir munu sjá um að halda uppi fjörinu. Þeir hafa því opnað vefsíðu, eins konar hópfjármögnunarsíðu, þar sem aðstandendur þeirra félaga geta keypt sér aðgangsmiða í samkvæmið.

„Við stefnum á að safna 2500 dollurum, eða um 330 þúsund krónum. Það er takmarkið. Raunverulega markmiðið eru 4500 dollarar [594 þúsund krónur] en það er sú upphæð sem þarf til að fá Dóra DNA til að koma og vera með uppistand og hljómsveitina Úlf Úlf til að spila,“ segir Vignir Örn.

Ræðuhöld, skífuþeytingar og konungleg háborð

Piltarnir opnuðu vefsíðuna á mánudag og létu viðbrögðin ekki á sér standa. Á einum sólarhring höfðu þeir safnað rúmum 330 þúsund krónum og hafa því þar með náð takmarkinu.  

Viðburðurinn virkar þannig að þeir sem hafa áhuga á að mæta kaupa sér boðskort í samkvæmið á rúmar tvö þúsund krónur. Það gefur samkvæmisgestum aðgang að léttum matar- og áfengisveitingum en um leið heljarinnar skemmtun. Því hærri sem upphæðin verður, því veglegri verður viðburðurinn.

„Það eru líka aðrir möguleikar í boði. Það er meðal annars hægt að greiða fyrir að gerast DJ í eitt lag. Þá fær sá aðili að þeyta skífum fyrir níu dollara [1.200 kr]. Þá er hægt greiða fyrir passa sem gefur þér kost á að fara fram fyrir raðir – á barinn eða klósettið, eða í raun bara þær raðir sem gætu skapast. Síðan er hægt að fá að greiða fyrir að halda þriggja mínútna ræðu og hægt að kaupa konunglegt háborð sem kostar 199 dollara eða 26 þúsund. Þau eru reyndar uppseld,“ segir Vignir.

Hugmyndin spratt eftir samræður þeirra félaga við mæður sínar um hver ætti að greiða fyrir veisluna. Þeir ákváðu því að hugsa út fyrir kassann, enda geta útskriftarveislur verið afar kostnaðarsamar. „Við vissum að það gæti verið til leið til að fá fólk til að taka þátt í þessu með okkur. Þessar síður eru orðnar svo góðar og notendavænar og ákváðum að rannsaka það aðeins betur. Við sáum það svo að það var ekkert til fyrirstöðu,“ segir hann.

„Við í raun eigum nóg af skyrtum, slaufum og svona hinum hefðbundnu gjöfum sem við hugsanlega fengjum í útskriftargjöf. Þannig að við vildum frekar fókusa á mjög skemmtilegan viðburð með öllu okkar fólki og þetta virtist vera góð lausn.“

Fyrsta hópfjármagnaða partý Íslandssögunnar

Allir geta lagt lóð sín á vogaskálarnar en Vignir segist þó vonast til þess að sjá sem flesta af sínum helstu vinum og ættingjum. „Þetta er auðvitað útskriftarpartý og við erum að reyna að ná að skapa þetta þannig að þetta verði aðallega okkar vinir og kunningjar, en vissulega er öllum frjálst að kaupa boðsmiða,“ segir Vignir og bætir við að öll gæsla verði tryggð.

„Þetta hefur örugglega verið gert úti í heimi en ég held það sé alveg öruggt að þetta hefur ekki verið gert á Íslandi. Ég held það sé pottþétt að þetta sé „crowdfunded“ partý Íslandssögunnar.“

Vignir Örn og Marinó eru afar góðir vinir en hafa þó ekki þekkst lengi. Þeir kynntust er þeir öttu kappi í frumkvöðlakeppni Gulleggsins og eiga það báðir sameiginlegt að vinna hjá frumkvöðlafyrirtækjum í Reykjavík. Vignir lærði tölvunarfræði í Háskólanum í Reykjavík og Marinó verkfræði í háskóla í Hollandi.

Hér má sjá upplýsingar um viðburðinn. 

Hópfjármögnunarsíður, eða „crowdfund“ hafa verið að ryðja sér til rúms á undanförnum árum. Karolina Fund er fyrsta hópfjármögnunarsíða landsins en henni var hleypt af stokkunum árið 2012. Eigendur tískuvörumerksins og verslunarinnar JÖR leituðu meðal annars á náðir Karolina Fund og náðu þannig að ljúka hlutafjáraukningu til að tryggja áframhaldandi rekstur fyrirtæksins við Laugaveg. Sirkus Íslands nýtti sér einnig vefsíðuna sem og Stundin.

Kynningamyndband þeirra félaga má sjá í spilaranum hér fyrir neðan.