Myndband birt af því þegar „Suge“ Knight keyrði yfir tvo menn

Myndband af því þegar „Suge“ Knight ók yfir tvo menn hefur verið birt á vef TMZ. Knight sætir nú ákæru vegna málsins en á myndbandinu sést aðdragandi málsins og þegar hann keyrir yfir mennina.

Atvikið átti sér stað í Compton í Bandaríkjunum en lögmaður Knight segir að ráðist hafi verið á hann og að Knight hafi óvart keyrt á mennina tvo þegar hann var að flýja undan árásarmönnunum.

Annar mannanna sem Knight ók á lést. Hann var 55 ára gamall.

Knight er þekktur fyrir að hafa verið stjórnandi hins margfræga útgáfufyrirtækis Death Row Records, en hann hefur ítrekað komist í kast við lögin.