Einn sigur í síðustu níu hjá Furman

Kristófer Acox spilaði í 21 mínútu þegar Furman Paladins tapaði á heimavelli gegn Wofford í bandaríska háskólaboltanum í körfubolta í gærkvöldi. Furman hefur unnið einungis einn af síðustu níu leikjum.

Leikurinn var virkilega jafn og spennandi. Staðan var 25-24 eftir fyrri hálfleikinn og eftir jafna og spennandi síðari hálfleik töpuðu Kristófer og félagar með tveggja stiga mun, 62-60.

Kristófer skoraði þrjú stig og tók fimm fráköst á þeim tíma sem hann spilaði, en John Davis skoraði 20 stig fyrir Furman. Það er mesta sem hann hefur skorað í háskólaboltanum.

Lee Skinner leiddi vagninn fyrir Wofford, en hann skoraði sautján stig.