Vilja að leitað verði umsagna vegna nýju Reykjavíkurhúsanna

Borgarráðsfulltrúar Framsóknar og flugvallarvina leggja til að leitað verði umsagna umhverfis- og skipulagsráðs, velferðarráðs mannréttingaráðs og stjórnkerfis- og lýðræðisráðs vegna tillagna starfshóps um nýju Reykjavíkurhúsin sem gert er ráð fyrir að rísi í Vesturbugt og á Kirkjusandi. Lögð var fram bókun þess efnis á borgarráðsfundi í morgun.

Sjá einnig: Tillögur að nýjum Reykjavíkurhúsum í Vesturbugt og Kirkjusandi

Í bókuninni segir að forsendur í kostnaðarlíkani starfshópsins séu ekki nægjanlega áreiðanlegar, þar sem kynning starfshópsins hefði að mestu leyti verið byggð á húsnæðisstefnu borgarinnar frá árinu 2011.

Þá segir að starfshópurinn hafi kynnt fimm ólíkar leiðir en að lögmætiskaflar í lok hverrar leiðar sé ábótavant. „Því verðum við að geta metið áhættu af málarekstri og mögulegum skaðabótum sem hver og ein leið kann að hafa í för með sér, sérstaklega með tilliti til EES samningsins, jafnræðis og samkeppnissjónarmiða,“ segir orðrétt í bókuninni.