Aðstæður á Gaza svæðinu í brennidepli í nýjasta myndbandi Blaz Roca

„Mér þykir mjög gott að geta sent frá mér þetta efni, en myndavélin er eitt öflugasta vopnið sem hægt er að beita í þessum aðstæðum,“ segir Bryndís Silja Pálmadóttir, sem tók upp myndefni sem notað er í nýju myndbandi við lag eftir rapparann Erp Eyvindarson, sem er einnig þekktur sem Blaz Roca. Bryndís Silja var stödd á Gaza-svæðinu fyrr á árinu á vegum samtakanna Ísland/Palestína. „Þetta er svo ljónhart efni, og þegar við fréttum af Bryndísi Silju í framlínunni í Palestínu kom ekkert annað til greina en að fá að nota myndefni frá Bryndísi í myndbandið,“ segir Erpur. Lagið ber titilinn Warsaw Gettó Gaza og er ádeila á stöðu mála í Palestínu í dag og setur Erpur það í sögulegt samhengi við hryllinginn sem átti sér stað í seinni heimsstyrjöldinni í boði Nasista.

Drykk, dick eða á standið í heiminum

Hann er ángæður með hvernig lagið kom út en í því nýtur hann aðstoðar strákanna í Dusk og rapparans Class B. „Ég er listamaður, ég verð að tjá mig. Að vekja upp tilfinningar er það sem listamenn vilja gera, það á við hvort sem ég rappa um dick og drykk eða ástandið í heiminum,“ bætir hann við.

Umhugað um stöðuna

Erpi og Bryndísi Silju er báðum mjög umhugað um stöðu Palestínumanna. „Þessi örvænting sem fólk stendur frammi fyrir og gerir allt sem það þarf til að verja sitt eins og gyðingar gerðu í Varsjá á sínum tíma, er hvatinn. Að standa í lappirnar og berjast með flugeldum á móti hitamiðuðum flugskeytum er þess virði að tala um,“ útskýrir Erpur. Bryndís Silja segir upplifunina af því að hafa séð ástandið með eigin augum hafa verið sterka. Hún tekur dæmi um sérstök hlið þar sem börn allt niður í fimm ára fara daglega í gegnum á leið sinni til skóla. „Þar eru ísraelskir verðir og mikið um ofbeldi á börnum og barnahandtökur. Við stóðum oft bara þarna við, til þess að sporna við að ofbeldið ætti sér stað, slíkur er máttur myndavélarinnar.“

Myndbandið frumsýnt á mánudag

„Formsins vegna gerist allt mjög hratt í svona myndbandi við lag sem telur kannski tvær, þrjár mínútur, svo við ætlum að sýna efnið hennar almennilega á mánudagskvöldið á KEX“, segir Erpur. Auk frumsýningar myndbandsins verður annað myndefni frá Palestínu og Ísrael sýnt. „Ég mun sýna valið efni og sýna umhverfið og öfgakenndu aðstæðurnar sem ég bjó við. Þessu verður svo fylgt eftir þar sem ég mun svara spurningum,“ bætir Bryndís Silja við. Kvöldið hefst klukkan átta næskomandi mánudag og er aðgangur ókeypis.