„Langur vegur framundan fyrir Grikkland“

Angela Merkel Þýskalandskanslari segir að nýtt samkomulag við Grikki feli ekki í sér skuldaniðurfellingar en skilyrði endurgreiðslna verði rýmkuð.

Grísk stjórnvöld náðu samkomulagi við lánadrottna sína í morgun eftir maraþonfund í gær og nótt. Samkomulagið felur í sér að grísk stjórnvöld fái nýtt 86 milljarða evra lán í skiptum fyrir skuldbindingar um miklar aðhalds- og niðurskurðaraðgerðir.

Samkomulagið hefur enn ekki verið gert opinbert, en vitað er að það felur í sér að Grikklandsstjórn þarf að stofna sérstakan sjóð fyrir fé sem fæst fyrir sölu ríkiseigna og endurgreiða lán með fé úr honum.

Fréttaritari SVT segir að samkomulagið feli mögulega í sér að Grikklandsstjórn fái lengri tíma til að endurgreiða lán sín og að hlé verði gert á endurgreiðslum á ákveðnu tímabili.

Auðveldar fjárfestingar

Alexis Tsipras, forsætisráðherra Grikklands, segir að samkomulagið muni greiða fyrir nýjum fjárfestingum í landinu, og þannig aðstoða gríska ríkinu að koma sér út úr kreppu og komast hjá hruni bankakerfisins. „Samkomulagið er erfitt en við komumst hjá þeirri kröfu að færa eignarhald á grískum ríkiseignum til útlanda.“

Christine Lagarde, forstjóri Alþjóðagjaldeyrissjóðsins, segir í samtali við Bloomberg að samkomulagið sé gott skref í átt að því að byggja upp traust að nýju.

Á blaðamannafundi sem haldinn var í morgun sagði Jean-Claude Junker, forseti framkvæmdastjórnar ESB, að útganga Grikkja úr evrusamstarfinu hefði aldrei komið til greina.

Þarf samþykkt þjóðþinga

Til að samkomulagið komi til framkvæmda þurfa þjóðþing evruríkjanna að samþykkja aðgerðirnar, þar á meðal gríska þingið. Samkvæmt drögum að samkomulagi verður slíkt að gerast fyrir 15. júlí. 

Aðstoð evruríkjanna mun að öllum líkum nema 86 milljörðum evra. Það mun ýta skuldum Grikkja yfir 200 prósent af vergri landsframleiðslu. Skilyrði fyrir neyðarláninu er að gríska ríkisstjórnin framselji ríkiseignir fyrir 50 milljónir evra sem tryggingu.