„Sjálfsagt og eðlilegt“ að koma áhyggjum Bolvíkinga á framfæri við Bankasýsluna

Bjarni Benediktsson, fjármálaráðherra, og Helgi Hjörvar, þingmaður Samfylkingarinnar deildu um það á Alþingi í dag hvort að afskipti fjármálaráðuneytisins af málefnum Sparisjóðs Bolungarvíkur og Sparisjóðs Norðurlands hefðu verið óeðlileg eða ekki.

Fram kom í fjölmiðlum í gær að forstjóri Bankasýslunnar, Jón Gunnar Jónsson, teldi að ráðuneytisstjóri fjármálaráðuneytisins, Guðmundur Árnason, hefði brotið lög þegar hann hafði tvívegis samband við forstjórann síðasta sumar og reyndi að hafa áhrif á val á stjórnarformanni í sameinuðum sparisjóði Bolungarvíkur og Norðurlands.

Þá beindi ráðuneytisstjórinn jafnframt þeim tilmælum til forstjórans að hann beitti sér fyrir því að umrætt fyrirtæki frestaði stjórnarfundi.

Fjármálaráðuneytið hafnaði þessum ásökunum með öllu í gær en í skriflegu svari ráðuneytisins til fréttastofu kom fram að fjármálaráðherra hefði viðrað áhyggjur Bolvíkinga af fyrirhugaðri sameiningu við ráðuneytisstjóra og beðið hann um að þeim á framfæri við forstjóra Bankasýslunnar.

Afskiptin „sláandi fréttir“

Helgi Hjörvar sagði á þingi í dag að ef umrædd afskipti hefðu átt sér stað væru það „sláandi fréttir“ og spurði fjármálaráðherra hvort þetta væri rétt.

Bjarni sagði að í fyrsta lagi kæmi það ekki á óvart að Bankasýslan hefði ýmislegt að athuga við frumvarp þar sem lagt væri til að hún yrði lögð niður. Varðandi samskipti ráðuneytisins við Bankasýsluna um sameiningu sparisjóðanna sagði Bjarni:

„Ég get staðfest það sem áður hefur komið fram að það var lýst miklum áhyggjum við mig, persónulega, vegna þess hvernig staðið væri að undirbúningi þeirrar sameiningar. Mér fannst sjálfsagt og eðlilegt að því yrði komið á framfæri við Bankasýsluna.“

Engin tilmæli í því að koma upplýsingum á framfæri

Fjármálaráðherra sagði svo að það hefðu ekki falist nein tilmæli í því að koma upplýsingunum á framfæri og bætti við:

„Menn eru nú komnir býsna langt frá kjördæmum sínum og tengslum við fólkið í landinu ef það er orðið þannig að það er glæpur og brot á lögum að koma sjónarmiðum fólksins í landinu á framfæri við stofnanir okkar.“

Helgi Hjörvar sagðist fagna því að fjármálaráðherra lýsti ábyrgð sinni á umræddum samskiptum ráðuneytisins við Bankasýsluna en sagði þetta þó gera samskiptin margfalt alvarlegri:

„Komin langt frá kjördæmum sínum segir hæstvirtur fjármálaráðherra. En hæstvirtur fjármálaráðherra, Bankasýslan var sett til þess að stjórnmálamenn væru ekki að grauta í málefnum fjármálafyrirtækja. [...] Þess vegna eru þetta grafalvarleg afskipti af sjálfstæði Bankasýslunnar og þarf að taka til alvarlegrar umfjöllunar hér í þinginu hvernig ráðherra fer með vald sitt.“

Málið stormur í vatnsglasi að mati fjármálaráðherra

Bjarni sagði málið ekkert annað en storm í vatnsglasi og sagði með ólíkindum að menn kæmu í ræðustól á Alþingi „til þess að halda því fram í fullri alvöru að menn eigi að vera svo aftengdir því sem er að gerast í stofnunum stjórnsýslunnar að ef menn dirfast að koma á framfæri upplýsingum [...] þá séu menn farnir að brjóta allar reglur og lög.“

Fjármálaráðherra sagði svo að hann hefði aldrei haft einhverjar hugmyndir um stjórnarmenn í sameinuðum sparisjóði og sagðist ekki vita hverjir hefðu verið skipaðir í stjórnina.