Arion óttaðist lægra verð yrði allt selt í einu

Arion banki hafði áhyggjur af því að of mikið framboð hlutafjár í Símanum við skráningu félagsins á markað gæti haft í för með sér að minna fengist fyrir hlutaféð. Þá gæti sala alls hlutafjárins komið í veg fyrir góðan markað eftir skráningu. Þetta kemur fram í svari bankans við fyrirspurn Fréttablaðsins.

Fimmföld umframeftirspurn var við sölu Arion banka á 21 prósents hlut í Símanum. Eignarhluturinn var seldur á 6,7 milljarða króna eða 3,33 krónur á hlut að meðaltali en alls bárust boð frá tæplega fimm þúsund fjárfestum fyrir samtals 33 milljarða króna.

Arion banki seldi samtals tíu prósenta hlut í Símanum til fjárfesta, stjórnenda hans, stórra viðskiptavina í einkabankaþjónustu hjá Arion banka og sjóðum í rekstri Stefnis, dótturfélags Arion banka, nokkrum vikum áður en almenningi var boðið að kaupa í Símanum. Verðmæti eignarhlutar þeirra sem fengu að kaupa fyrirfram hefur hækkað um 720 milljónir króna.

Arion banki segir að ekki hafi legið fyrir fyrirfram hvert útboðsgengið yrði frekar en í fyrri útboðum bankans.

„Í þeim hefur eftirspurn verið misjöfn og niðurstaðan hvað hlutabréfaverð varðar verið allt frá neðri hluta verðbils til efri marka. Eins og gefur að skilja þá lá ekki fyrir hver niðurstaða útboðsins yrði, hvorki hvað varðar eftirspurn né hlutabréfaverð, á þeim tímapunkti sem þessi viðskipti fóru fram.“

Salan fyrir útboðið fór fram í tvennu lagi. Í ágúst keypti hópur sem settur var saman að frumkvæði Orra Haukssonar, forstjóra Símans, hlutabréf á þriðjungi lægra verði en fékkst í hlutafjárútboðinu, eða á 2,5 krónur á hlut, og hefur virði þess hlutafjárins því hækkað um 440 milljónir króna. Orri eignaðist sjálfur 0,4 prósenta hlut í félaginu í viðskiptunum. Fjárfestarnir mega hins vegar ekki selja eignarhlut sinn fyrr en í mars árið 2017.

Þá var fimm prósenta eignarhlutur seldur stórum viðskiptavinum í einkabankaþjónustu sem og sjóðum í rekstri Stefnis, dótturfélags Arion banka, á 2,8 krónur á hlut og hefur eignarhluturinn því hækkað um 280 milljónir króna í virði.

Bankinn bendir á að hluturinn til viðskiptavina hafi verið seldur innan verðbils útboðsins sem hafi verið 2,7-3,1 króna á hlut. Þá séu söluhömlur á og því hafi verið eðlilegt að verðið væri í lægri enda verðbilsins þar sem meiri áhætta sé fólgin í því að kaupa hlutabréf með söluhömlum. Einnig sé óvissa sé um hvert hlutabréfaverðið verði þegar söluhömlunum verði aflétt.