Kryddsíld í Tímaflakki vegna truflana

Hin árlega Kryddsíld Stöðvar 2 verður aðgengileg með Tímaflakki í Sjónvarpi Símans fram eftir degi. Truflanir voru á útsendingunni í tæpar tvær klukkustundir, eða frá klukkan 13.30. Sérfræðingar sjónvarpskerfa Símans hafa komist fyrir vandann, að því er segir í tilkynningu frá Símanum.

Við biðjum viðskiptavini okkar velvirðingar og þykir ákaflega leitt að hafa haft af mörgum Kryddsíldina á réttum tíma þetta árið. Þessar truflanir urðu á afleitum tíma en unnið var hratt og vel að viðgerð. Við vonumst til þess að allir þeir sem fundu fyrir truflunum geti með Tímaflakki séð það sem þeir misstu af,“ segir Gunnhildur Arna Gunnarsdóttir, upplýsingafulltrúi Símans.

Áhrif truflananna voru misjöfn en mest á Stöð 2. „Við hjá Símanum biðjum líka starfsfólk 365 afsökunar á vandræðunum sem höfðu áhrif á metnaðarfullan og flottan þátt þeirra, sem nú er sýndur í 25. sinn. Um leið þökkum við þeim fyrir að gera okkur kleift að leyfa viðskiptavinum að sjá þáttinn með Tímaflakki.“

Til að nálgast þáttinn má ýta á i-takkann á fjarstýringunni, velja Kryddsíld og þrýsta næst á OK.

Þá er einnig hægt að horfa á þáttinn á Vísi.