Viðvörun vegna fárviðris: „Glórulaus bylur“ í aðsigi

Veðurstofa Íslands varar við ofsaveðri eða fárviðri á landinu síðdegis á morgun og annað kvöld, fyrst sunnanlands. Fárviðrið skellur á sunnanvert landið eftir klukkan 15 á morgun, og eftir klukkan 19 má búast við ofsaveðri eða fárviðri um allt land.

Í fréttatilkynningu frá Veðurstofunni segir að úrkoma fylgi og að hún verði á formi snjókomu. Því megi búast við glórulausum byl, líkt og það er orðað í tilkynningunni. Þá má búast við miklu úrkomumagni um landið austanvert. Seint annað kvöld er útlit fyrir að það hlýni nægilega sunnantil á landinu til að úrkoma verði á formi slyddu eða rigningar.

Til að setja væntanlegt veður í samhengi er bent á að spáin fyrir morgundaginn hljóðar upp á mun verra veður en var í vikunni sem er að líða. Ofsaveður eru 11 gömul vindstig og er þá meðalvindhraði meiri en 28 metrar á sekúndu. Fárviðri eru 12 gömul vindstig og er þá meðalvindhraði meiri en 32 metrar á sekúndu.