Lífið

Sjáðu siguratriði Skrekks: "Ekki taka burtu plássið sem er frátekið af strákum“

Birgir Olgeirsson skrifar
Hagaskóli vann hæfileikakeppni grunnskóla í Reykjavík í ár.
Hagaskóli vann hæfileikakeppni grunnskóla í Reykjavík í ár. Vísir/Ernir
Það var Hagaskóli sem bar sigur úr býtum í hæfileikakeppni grunnskóla í Reykjavík, Skrekk, í gærkvöldi og hefur atriðið vakið mikla athygli fyrir femínískan boðskap þess. Atriðið samanstendur af dansi og nokkurs konar rapp-ljóði um það hvernig er að vera ung stúlka í íslensku samfélagi.

„Elsku stelpur, ekki fara ykkur að voða. Ekki taka burtu plássið sem er frátekið af strákum. Ekki krefjast þess að þið séuð virtar því þið eigið minna skilið. Haltu þig í þínu horni, málaðu þig meira, málaðu þig minna, málaðu þig minni,“ var meðal þeirra ádeilu sem kom fram í ádeilunni og þá var minnst á reglur um klæðaburð stúlkna í tengslum við Samfés.

Ef klæðast á kjól eða pilsi sem nær ekki niður fyrir hné skal klæðast lituðum sokkabuxum eða leggins sem ná niður á ökkla. „Því leggir á fimmtán ára stelpum gefa of mikið í skyn,“ hrópuðu stúlkurnar.



Hér má sjá atriðið úr útsendingu Skjás Eins en það var birt á Nútímanum.:

Hagaskóli í Skrekk 2015 from Nútíminn on Vimeo.

Texta atriðisins má lesa hér fyrir neðan en hann var birtur á vefritinu Knúzinu:

Ég var tíu ára þegar ég var fyrst kölluð hóra

Þá skildi ég ekki af hverju, núna skil ég

Ég var fyrir, ég var stjórnsöm,

fór yfir mörkin og reyndi að brjóta boxið,

en ég var lítil og ég var stelpa.

Elsku stelpur,

ekki fara ykkur að voða.

Ekki taka í burtu plássið sem er frátekið af strákum,

því ef þú ert með typpi færðu einn fermeter í viðbót

ekki krefjast þess að þið séuð virtar, þið eigið minna skilið.

Klæddu þig eins og ég vil hafa þig

haltu þig í þínu horni

málaðu þig meira, málaðu þig minna

málaðu þig minni

Klæðaburðarviðmið Samfés:

Númer eitt: Ef klæðast á kjól eða pilsi sem nær EKKI niður fyrir hné skal klæðast lituðum sokkabuxum eða leggings.

Vegna þess að leggir á fimmtán ára stelpum gefa of mikið í skyn.

Númer tvö: Varast skal að klæðast of flegnum bolum eða kjólum.

Vegna þess að húðin á fimmtán ára stelpum gefur of mikið í skyn.

Æstu þig, æstu þig, æstu þig

Þú ert umkringd af óréttlæti og ættir helst að öskra.

—LE DROP–

Róaðu þig niður, ekki hafa svona hátt

ertu ekki bara að byrja á túr?

Passaðu þig! Þú hræðir strákana í burtu,

þú talar allt of mikið.

Hættu þessu, þú veist betur

“þú hefur ekkert alltaf rétt fyrir þér”

Vertu kurteis, ekki vera vandró

ekki koma mér í óþægilega stöðu,

ekki fokking blóta!

Vertu skynsöm vertu dugleg,

tíndu upp draslið sem aðrir skilja eftir,

týndu þér.

Gleymdu hvaða máli þú skiptir,

láttu þig hverfa.

Vertu sæt, vertu sexý,

ekki fara samt yfir strikið.

Þú veist hvað gerist

ef þú sýnir aðeins of mikið.

og í guðana bænum ekki senda honum ‘myndir’

Því þú, þín brjóst, þinn líkami og allt sem þú ert

er skítugt og ljótt og bannað

og ekki til að deila með öðrum

og þú mátt ekki eiga það sjálf

— LE 2nd DROP —

Elsku feðraveldi,

veistu, þegar þú segir mér að róa mig

og halda bara kjafti,

hveturu mig áfram

til að öskra af öllu afli

þú getur ekki stoppað það sem þú veist að er að koma

þú skilur ekki erfiðið, þú ert ekki kona.

Þið horfið upp á sviðið og sjáið ekki stráka

og einhverjir hugsa “hvar er jafnréttið í þessu?”

en við viljum vita hvar er jafnréttið í öllu?

Hvar eru konur í heiminum yfir höfuð?

Það eru konur hérna, á þessu sviði, núna,

en sumir þurfa alltaf að skima eftir strákum

Við höfum barist svo lengi

fyrir ótal sjálfsögðum hlutum

að baráttan í sjálfu sér

er orðin sjálfsagður hlutur.

En við biðjum ykkur stelpur,

að halda alltaf áfram,

að gleyma ekki skiltunum

sem stóðu upp úr göngum

að gleyma aldrei konunum

sem hrópuðu í myrkri

að gleyma síst öllum stelpunum

sem voru dónar og tíkur og fyrir.

Stelpur krefjast athygli

ekki reyna að hunsa okkur.

Stelpur krefjast tækifæra

ekki reyna að hindra okkur

Stelpur krefjast virðingar

ekki reyna að stoppa okkur.

Stelpur krefjumst jafnréttis

látum ekkert stoppa okkur!






Fleiri fréttir

Sjá meira


×