Nóvemberspá Siggu Kling – Krabbi: Hentu þér út í djúpu laugina

Elsku fallegi krabbinn minn. Það er sama hvað þér gengur vel, það er samt eins og þig vanti töluverða trú á því að allt sé að fara eins og þú vilt að það fari. Er hreint borð í kringum þig? Ertu búinn að borga þær skuldir sem skipta mestu máli? Ef ekki verður þú að gera það eða semja um þær. Þá fer allt svo miklu betur.

Heimilið þitt er svo dásamlegt og það gefur frá sér eins konar töfraorku. Þú setur fallegar tilfinningar í allt sem tengist heimilinu þínu og þar færðu bestu hugmyndirnar. Mundu það.

Þú ferð að þrá breytingar og ert spenntur fyrir að ná hærri hæðum í lífinu. Hentu þér út í djúpu laugina, gerðu eitthvað nýtt. Það er svo mikil orka í næstu þremur mánuðum, taktu hana til þín og notaðu hana.

Allir elska kímnigáfuna þína og þú heillar alla með orðum. Segðu satt - í því felst lykillinn að árangri þínum.

Fólk vill semja við þig en ekki svíkja þig. Fáðu lánaða dómgreind hjá einhverjum öðrum áður en þú tekur einhverjar ákvarðanir sem snúa að samningum svo þú semjir ekki af þér.

Það býr í þér listamaður á einhverju sviði svo leyfðu öðrum að njóta þessara hæfileika þinna. Þetta getur haft eitthvað með sjónvarp að gera, myndlist, að skrifa, elda eða að tala fyrir framan fólk. Finndu þinn hæfileika og drífðu þig af stað. Aldur skiptir engu máli hjá þér, þú ert eitthvað svo aldurslaus svo láttu árin ekki stoppa þig!

Mottó: Ég hef kraft til að breyta

Frægir krabbar: Bryndís Schram, Sigga Lorange Ostabúðarskvísa, Auddi Blö, sem við elskum öll, Dagur B. Eggertsson, borgarstjóri og dúlla, Ólafur Stefánsson, handboltakappi og heimspekingur, Edda Sif, Sindri Sindrason, Ásdís Halla Bragadóttir, Hjörvar Hafliðason og Lars Lagerbäck landsliðsþjálfari.