Nóvemberspá Siggu Kling – Meyja: Kraftmikill mánuður að hefjast

Elsku stórmerkilega meyjan mín. Það er búið að vera svo mikið að gerast hjá þér og þú ert búin að vera að takast á við hlutina í lífi þínu á mjög góðan máta. Steinhættu að berja þig á bakið með svipunni og vertu ekki svona ströng við þig! Hættu að rífa þig niður því þú ert búin að vera rosalega dugleg og útkoman sem þú ert búin að vera að bíða eftir er beint fyrir framan þig.

Þú þarft að hvíla þig og vera svolítið kærulaus, leyfa þér að sofa og hvílast. Framtíðin er svo björt og fögur fyrir framan þig. Það er svo margt búið að vera að gerast sem er svo jákvætt svo þakkaðu fyrir það og gefðu því meiri gaum.

Það er búinn að vera mikill hraði á fólkinu í kringum þig og hugsanir þínar eru eins og þeytivinda. Það kemur fyrir að maður getur orðið ofur viðkvæmur og leyfðu þér það bara. Það er bara merki um tilfinningagreind.

Þú ert svo miklu sterkari en þú heldur og núna ertu í vinningsliðinu svo þú skalt einbeita þér að því sem skiptir máli.

Ef þú ert á lausu kæra meyja, þá er ástarorkan í rífandi stuði og þú mátt taka áhættu! Mundu að það er ekkert dásamlegra en að elska.

Þú munt vera miðpunktur athyglinnar og þú skalt leyfa þér að njóta alls þess sem á eftir að vera í kringum þig. Þú hefur útgeislun á við sólina þegar þér líður vel, svo láttu ekki ömurlegar hugsanir og neikvæðni koma í veg fyrir að þú sjáir að þú ert sigurvegari.

Nóvembermánuður verður kraftmikill og þú átt eftir að sýna yfirburði á mörgum sviðum svo leyfðu þér að hlakka til.

Mottó: Láttu hjartað ráða fõr

Frægar meyjur: Ragna Lóa Stefánsdóttir íþróttakona, Manuela Ósk fyrirsæta, Björk Eiðsdóttir ritstýra, Andrea fatalistamaður, Claudia Schiffer fyrirsæta, Edda Björgvinsdóttir leikkona, Herdís Jóhannesdóttir athafnakona, Beyoncé Knowles söngkona, Gylfi Þór Sigurðsson, Eiður Smári Guðjohnsen, Sigrún Ósk Kristjánsdóttir sjónvarpskona, Annie Mist crossfittari, Logi Pedro Stefánsson, tónlistarmaður.