Íslendingur í Noregi grunaður um alvarlegt ofbeldi gegn tveggja ára barni

23 ára gamall Íslendingur hefur verið úrskurðaður í fjögurra vikna gæsluvarðhald í Noregi vegna gruns um að hafa beitt tveggja ára gamalt barn alvarlegu líkamlegu ofbeldi. Frá þessu er greint á vef DV en auk þess er fjallað um málið í norska miðlinum Aftenbladet.

Í frétt Aftenbladet kemur fram að maðurinn hafi verið handtekinn á föstudagskvöld og úrskurðaður í gæsluvarðhald, meðal annars vegna þess að lögreglan taldi að maðurinn myndi reyna að flýja land eða eyðileggja sönnunargögn sem tengjast málinu.

Íslendingurinn er ekki faðir barnsins heldur á í sambandi við móður þess sem einnig er íslensk. Líkamsárásin á að hafa átt sér stað í seinustu viku í bænum Lye, sem er skammt frá Stavanger, en maðurinn býr þar og var nýfluttur inn til móður barnsins að því er segir í frétt DV.

Unni Byberg Malmin, saksóknari hjá lögreglunni í Stavanger, segir í samtali við Aftenbladet að málið sé litið alvarlegum augum. Rannsókn þess er nú í fullum gangi og hefur lögreglan meðal annars biðlað til þeirra sem gætu vitað eitthvað um málið að hafa samband við lögregluyfirvöld.

 

Samkvæmt Malmin hefur Íslendingurinn ekki áður fengið dóm í Noregi en fram kemur í frétt DV að hann hafi hlotið 18 mánaða fangelsisdóm fyrir líkamsárás hér á landi árið 2012.

Líðan barnsins er eftir atvikum góð en það liggur enn inni á sjúkrahúsinu í Stavanger.