Kobe ekki búinn að taka ákvörðun um framtíðina

Kobe Bryant, leikmaður Los Angeles Lakers, segist ekki vera búinn að ákveða hvert framhaldið verður að tímabilinu loknu.

Hinn 37 árs gamli Bryant er að hefja sitt 20. tímabil í NBA-deildinni en hann hefur leikið allan ferilinn með Lakers og orðið fimm sinnum meistari með liðinu.

Undanfarin tímabil hefur hinsvegar hægst á honum vegna meiðsla og hafa fjölmiðlar í Bandaríkjunum fyrir vikið velt fyrir sér hvort þetta tímabil verði hans síðasta í NBA-deildinni.

Hann segist hinsvegar ekkert vera farinn að velta því fyrir sér en hann á aðeins eitt ár eftir af samingi sínum hjá Lakers.

„Ef ég legg skónna á hilluna, þá geri ég það. Ef ég ákveð að taka annað tímabil, þá verð ég klár í slaginn þegar að því kemur. Ég velti mér ekkert upp úr þessu enda reyni ég aðallega að einbeita mér að tímabilinu sem er að hefjast.“