Malín Agla ætlar að verða heimsmeistari

Malín Agla Kristjánsdóttir nemi er á leið til Grikklands og Noregs á morgun til að fara í dansprufur í leit að rétta dansherranum en hún er án dansherra þessa stundina.

Hún stefnir hátt í dansheiminum en markmiðið er að verða heimsmeistari einn daginn. „Ég er númer níu á heimslistanum í tíu dönsum í dag, svo ég á ekki langt í land.“

Malín spáir mikið í tísku og finnst gaman að setja saman mismunandi flíkur og liti og prófa eitthvað nýtt og öðruvísi.

Hefurðu lengi pælt í tískunni? Ég hef alltaf verið meðvituð um hana en ég byrjaði ekki að pæla í henni fyrr en ég flutti til Kaupmannahafnar árið 2012. Þar fékk ég rosalega mikinn innblástur og stíllinn minn breyttist mikið og hratt á meðan ég bjó þar. Svo flutti ég til Frakklands 2014 og þá má segja að tískuáhuginn hafi farið á flug.

Hvernig klæðir þú þig hversdags? Ég get nú ekki sagt að ég sé „gallabuxur og bolur-týpan“ því mér finnst svo rosalega gaman að prófa mig áfram. Ég reyni alltaf að vera í einhverri nýrri fatasamsetningu á hverjum degi. Ég á þó daga þar sem aðeins erfiðara er að koma sér fram úr og þá dett ég stundum í gallabuxna- og kósípeysu-gírinn.

Hvernig klæðir þú þig spari? Mér finnst rosalega gaman að klæðast fínum kjól og hælum þegar ég get. Svo er líka flott að para saman flottar gallabuxur, fínan bol og blazer-jakka með töffarastígvélum eða klassískum pinnahælum.

Hvernig lýsir þú stílnum þínum? Klassískur, kynþokkafullur, fágaður og stundum töff. Það er erfitt að nota bara fáein orð því stíllinn minn fer algjörlega eftir því hvernig skapi ég er í þann daginn!

Hvað veitir þér mestan innblástur? Í augnablikinu fæ ég mikinn innblástur frá New York Fashion Week sem var að klárast í New York. Ég reyni að fylgjast með nýjustu tískustraumunum og halda mér í takt við þá þó svo mér finnist gaman að klæða mig eins og ég vil.

Hvar kaupir þú fötin þín? Ég kaupi flest öll fötin mín í útlöndum eða á netinu en ein búð hérna heima sem ég elska er Zara. H&M er líka klassísk og ég heimsæki líka Topshop og Gallerí 17 mikið.

Hver er uppáhaldsflíkin þín? Uppáhaldsflíkin mín er risastór hvít kósípeysa sem ég keypti í H&M. Ég lifi í henni og ég vil meina að allir, stelpur og strákar, eigi að eiga eina stóra góða kósípeysu inni í fataskáp!

Uppáhaldshönnuður? Nokkrir af uppáhaldshönnuðum eru Michael Cost­ello, Vera Wang, Karl Lagerfield, Stella McCartney og þeir eru fleiri.

Hverju verður bætt við fataskápinn fyrir haustið? Ég er að leita mér að nýrri kápu í einhverjum fallegum haustlit því mig vantar eina svoleiðis í fataskápinn núna. Svo verður örugglega nokkrum rúllukragabolum, sætum ökklastígvélum og fallegum treflum bætt við inn í fataskápinn á næstunni.

Hver er helsti veikleiki þinn þegar kemur að tísku og útliti? Minn helsti veikleiki er örugglega skór og förðunarvörur. Mér finnst mig alltaf vanta meira af þessu og ég á alveg örugglega aðeins meira en maður þarf að eiga?…

Hvers konar fylgihluti notarðu? Ég er alltaf með gullarmband og hálsmen sem ég fékk frá mömmu minni, ég tek þetta aldrei af mér. Svo finnst mér fallegt að vera með gullhringi og svo demants­eyrnalokka eða eitthvað mjög einfalt. Svo er ég alltaf með handtöskuna mína með mér hvert sem ég fer og svartan trefil, núna þegar það er byrjað að kólna örlítið.

Áttu þér tískufyrirmynd? Allar mínar tískufyrirmyndir eru Hollywood-stjörnur en þær eru meðal annars Khloe Kardashian, Kim Kardashian West, Gigi Hadid, Kendall Jenner, Hailey Baldwin og margar fleiri. Annars eru bara allir í kringum mig líka tískufyrirmyndir. Mér finnst rosalega gaman að fylgjast með tískunni í kringum mig því hún er mjög fjölbreytt. Ég fæ innblástur frá öllu og öllum og ef ég sé einhvern í flík sem mér finnst flott eða áhugaverð hika ég ekki við að spyrja um hana.