Sport

Gunnar fær risabardaga í Las Vegas

Henry Birgir Gunnarsson skrifar
Gunnar í búrinu í MGM Grand Garden Arena. Hann verður þar aftur í desember.
Gunnar í búrinu í MGM Grand Garden Arena. Hann verður þar aftur í desember. vísir/getty
Gunnar Nelson mun mæta einum besta veltivigtarmanni heims á risakvöldi UFC í Las Vegas í desember. Kvöldinu þar sem Conor McGregor mun loksins berjast við Jose Aldo.

Andstæðingur Gunnars að þessu sinni er hinn magnaði Brasilíumaður, Damian Maia. Sá er að verða 38 ára í næsta mánuði en þrátt fyrir aldurinn er hann enn einn sá besti. Þetta verður annar bardagi Gunnars í Bandaríkjunum en hann hengdi Brandon Thatch eftirminnilega í júlí.

Maia er gríðarlega reynslumikill. Búinn að keppa 27 sinnum í UFC og hefur unnið 21 bardaga og aðeins tapað sex sinnum. Þessi sex töp eru ekki gegn neinum smá mönnum heldur gegn Rory McDonald, Jake Shields, Chris Weidman, Mark Munoz, Anderson Silva og Nate Marquardt.

Maia á leið í hringinn í sínum síðasta bardaga.vísir/getty
Loksins bardagi gegn manni á topp tíu

Hann er í sjötta sæti á styrkleikalista UFC en Gunnar er í ellefta sæti. Þetta verður fyrsti bardagi Gunnars við mann á topp tíu listanum en Gunnar hefur lengi kallað eftir því að fá að keppa við þá allra bestu. UFC hefur nú svarað kalli okkar manns.

Það sem gerir þessa viðureign enn meira spennandi en ella er að þarna mætir Gunnar manni sem er stórkostlegur í gólfinu en þar hefur Gunnar alltaf haft mikla yfirburði.S

Sjá einnig: Gunnar: Öruggur sigur gæti komið mér í umræðu um titilbardaga

„Hann er af mörgum talinn vera besti gólfglímumaðurinn í UFC. Hann er margfaldur heims- og heimsbikarmeistari í jiu jitsu. Hann er Suður-Ameríkumeistari og Brasilíumeistari. Hann er búinn að vinna þetta allt saman. Gunni hefur alltaf sagt að það yrði synd ef hann myndi aldrei keppa við Maia af því hann er svo svakalega góður í gólfinu. Gunna langar alveg rosalega að keppa við hann," segir Haraldur Dean Nelson, faðir og umboðsmaður Gunnars.

„Hann er goðsögn í jiu jitsu heiminum og gríðarlega reyndur. Hann var áður í millivigtinni og keppti þá við Anderson Silva um titilinn þar. Þar tapaði hann á dómaraúrskurði eftir fimm lotur. Silva er sigursælasti bardagamaðurinn í millivigtinni í sögu UFC. Hann varði titilinn tíu sinnum."

Maia á vigtinni.vísir/getty
Maia hefur aldrei verið stöðvaður

Eftir að hafa gert góða hluti í millivigtinni ákvað Maia að fara niður í veltivigtina þar sem hann hefur haldið áfram að láta að sér kveða. Hann er búinn að vinna þrjá bardaga í röð gegn sterkum andstæðingum en tapaði þar á undan tveim í röð. Þar á meðal gegn Kanadamanninum Rory McDonald sem lenti í ótrúlegum bardaga gegn Robbie Lawler um titilinn í Las Vegas í sumar.

„Maia hefur aldrei verið hengdur í bardaga og aldrei stöðvaður í veltivigtinni. Maia tók meðal annars Rick Story í fyrstu lotu," segir Haraldur en eins og Íslendingar ættu að muna kom eina tap Gunnars á ferlinum í bardaga gegn Story í Stokkhólmi.

Frumraun Gunnars í Bandaríkjunum í sumar var á stærsta kvöldi í sögu UFC. Þetta kvöld í desember verður stærra enda mun Conor McGregor þá loksins keppa við Jose Aldo. Einnig munu Chris Weidman og Luke Rockhold keppa um titilinn í millivigtinni.

„Þeir segja að þetta kvöld verði stærra og margt sem bendir til þess. Það má í það minnsta lofa rosalegu kvöldi þarna í MGM Grand."

Kvöldið verður að sjálfsögu í beinni útsendingu á Stöð 2 Sport.

Það má fara að telja niður í þessa veislu.
MMA

Tengdar fréttir

Sjáðu Gunnar Nelson hengja Thatch

Gunnar Nelson stimplaði sig inn í Bandaríkjunum með látum þegar hann pakkaði Brandon Thatch saman á UFC189.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.