Eiríkur Helgason reisir sér einbýlishús á Akureyri: Allt á floti fyrstu nóttina

Snjóbrettakappinn Eiríkur Helgason, eða Eiki eins og hann er oftast kallaður, er í ítarlegu viðtali við vefsíðuna Albumm en þar segir hann frá rekstri fyrirtækja sinna, bestu snjóbrettastöðum heims og það að hann sé að byggja sér einbýlishús á Akureyri, alveg frá grunni.

„Ég hefði vonandi verið atvinnumaður á hjólabretti, en ef við hugsum um eitthvað annað en bretti þá veit ég ekki hvað ég væri að gera? Ætli ég hefði ekki bara klárað smiðinn, ég tók eitt ár á smíðabraut áður en ég flutti til Svíþjóðar,“ segir Eiríkur um það hvað hann hefði starfað við ef snjóbrettabransinn hefði ekki orðið fyrir valinu.

Uppáhaldsstaðurinn er Japan

Eiríkur hefur rennt sér á snjóbretti út um allan heim.

„Mér finnst alltaf geggjað að ræda í Hlíðarfjalli á Akureyri því þar ólst maður upp, en annars er Japan minn uppáhalds staður. Þar er geggjað púður og snjórinn extra léttur og helling af honum. Einnig eru Big Bear í Californiu, Tahoe í Californiu, Arlberg í Austurríki og kläppen í Svíþjóð en það er einmitt fjallið sem við ræduðum í skólanum. Þetta eru mínir uppáhalds staðir.“

Árið 2001 stofnaði Eiríkur snjóbrettafyrirtækið Lobster ásamt bróðir sínum Halldóri Helgasyni. Nú eiga þeir fjögur fyrirtæki.

„Við erum með fjögur fyritæki, Lobster Snowboards, Switchback Bindings, Hoppipolla Headwear og 7/9/13 Belts & Accessories. Við stofnuðum þau flest árið 2011 og það gengur bara fínt. Fyrirtækin eru öll bara lítil og þægileg en við erum að vinna með góðu fólki sem hjálpar okkur mikið með viðskipta hliðina en eins og er sjáum við aðallega um hönnunina. Við byrjuðum á Lobster því að mér og Halldóri langaði að vera með sama styrktaraðila til að geta rædað meira saman og það var enginn sem gat tekið okkur báða í teymið hjá sér. Þessi hugmynd að stofna okkar eigið merki poppaði upp og okkur leyst bara vel á það, þannig við bara hentum okkur útí þetta og sjáum alls ekki eftir því.“

Reynir að brasa í því sem hann getur

Eiríkur er að reisa sér hús í sínum heimabæ, Akureyri.

„Ég bý úti í Monaco sem er algjör snilld, ég elska að vera þarna þegar maður þarf á góðu veðri að halda. Já, ég er búinn að vera að byggja, eða réttara sagt láta byggja hús á Akureyri. Ég reyni að brasa í því sem ég get sjálfur semsagt svona „idiot proof” verkum sem á ekki að vera hægt að klúðra.“



Eiríkur segir að þetta sé einskonar gæluverkefni hjá honum.

„Partur af húsinu loksins orðinn íbúðarhæfur þannig að maður er með stað þegar maður er á Akureyri. Planið er að klára restina bara hægt og rólega og þegar maður hefur tíma. Þetta hefur ekki gengið alveg hundrað prósent fyrir sig t.d. daginn sem við ætluðum að sofa fyrstu nóttina, var allt komið á flot. Gólfhitalögn hafði sprungið og sprautaðist heitt vatn útum allt og á allt, en þetta slapp ótrúlega vel, allavega mun betur en maður sá fyrir sér þegar maður sá allt á floti.“