Aldrei fleiri sótt um hæli í einum mánuði

Ár er liðið síðan Rauði krossinn tók að sér réttindagæslu fyrir hælisleitendur á Íslandi. Síðan þá hafa tvö hundruð tuttugu og sex manns sótt um hæli á Íslandi.

Þar af eru átján frá Sýrlandi. Atli Viðar Thorstensen verkefnisstjóri hjá Rauða Krossinum segir að Ísland gæti gert betur og standi sig ekki nógu vel í samanburði við önnur Norðurlönd. Það mætti hugsa sér að tekið yrði á móti allt að fimmtíu manna hópum af kvótaflóttamönnum á hverju ári og stundum fleirum.

Skora á innanríkisráðherra

Hælisleitendur það sem af er ágústmánuði eru þrjátíu og sjö en umsækjendur hafa aldrei verið jafn margir í einum mánuði. Samtökin Ekki fleiri brottvísanir skora á innanríkisráðherra að senda ekki hælisleitendur í önnur ríki á grundvelli svokallaðrar Dyflinnarreglugerðar.

Benjamin Julian talsmaður þeirra segir ómannúðlegt að senda fólk frá á grundvelli reglugerðar sem sé að flýja stríð og þurfi hjálp. Þýsk yfirvöld ákváðu þann 21. ágúst síðastliðinn að hætta að beita reglugerðinni vegna komu mikils fjölda Sýrlendinga til Evrópu.