Viðskipti innlent

Segjast ekki vera að láta undan hótunum um lokun

Heimir Már Pétursson skrifar
Talsmaður samninganefndar starfsmanna í álverinu í Straumsvík segir stéttarfélögin ekki vera að láta undan hótunum um lokun fyrirtækisins með því að afboða verkfall hjá Ísal um næstu mánaðamót. Hann vonist hins vegar til að þessi ákvörðun liðki fyrir samningnum.

Mikill hiti hefur verið í viðræðum starfsmanna álversins í Straumsvík og fyrirtækisins undanfarna mánuði en þeir hafa verið í yfirvinnubanni um nokkurra vikna skeið. Deilan hefur að mestu snúist um kröfu Ísal um aukna verktöku, sem er í anda starfsemi hins bandaríska móðurfélags Rio Tinto Alcan.

Boðað hafði verið til allsherjarverkfalls í álverinu hinn 1. september ef samningar nást ekki en fyrirtækið hefur sagt að það gæti þýtt að starfsemi þess á Íslandi yrði hætt.

Í dag tilkynntu verkalýðsfélögin hins vegar að þau hefðu fallið frá verkfallsboðuninni. Gylfi Ingvarsson talsmaður samninganefndarinnar segir starfsmenn ekki vera að láta undan hótunum fyrirtækisins um lokun með þessari ákvörðun.

„Nei, það er langur vegur frá. Við erum fyrst og fremst að skapa stöðu til þess að takast á um það sem skiptir mestu máli. Það er að bæta kjörin,” segir Gylfi.

Þessi hótun Ísal og Rio Tinto Alcan hafi ítrekað verið sett fram undanfarin misseri. Menn hafi einfaldlega talið þetta skynsamlega ákvörðun í stöðunni og yfirvinnubannið sem hafi bitið nokkuð haldi áfram.

Með því að falla frá verkfallsboðuninni, er þá ekki dálítill þungi farinn úr ykkar baráttu?

„Nei ég tel ekki svo vera. Vegna þess að þetta léttir nokkuð mikið á því umhverfi sem við erum í að ræðast við og við urðum strax vör við það í gær. En til hvers það leiðir endanlega á eftir að koma í ljós af því við ætlum að hittast aftur á föstudaginn,“ segir Gylfi.

Vonandi leiði þetta til alvöru viðræðna og samninga. En slæm staða fyrirtæksins sé ekki starfsmönnum og þeirra kjörum að kenna heldur ákvörðunum fyrirtækisins sjálfs á undanförnum árum.

Þannig að þið trúið semsagt hótuninni?

„Það er nú bara þannig að Rio Tinto er harður aðili við að eiga. Við erum að upplifa það sem önnur fyrirtæki úti í heimi hafa staðið í stríði við. Við erum að upplifa það núna hér,“ segir Gylfi Ingvarsson.


Tengdar fréttir

Starfsmenn ISAL afboða verkfall

Samninganefnd segir ákvörðunina tekna "vegna ítrekaðra fullyrðinga stjórnenda RTA, að komi til allsherjarverkfalls leiði það til lokunar fyrirtækisins“.






Fleiri fréttir

Sjá meira


×