„Fjórum mánuðum áður en þessi mynd var tekin var mér nauðgað“

„Ég er búin að skrifa þennan póst að minnsta kosti tuttugu sinnum á undanförnum árum og hætta við að þora að birta hann jafn oft, en ég ætla ekki að þegja lengur.“

Þannig hefst Facebook-færsla Sunnu Ben, eins af skipuleggjendum Druslugöngunnar í ár, en í færslunni segir Sunna frá því þegar henni var nauðgað auk þess sem tvisvar sinnum var gerð tilraun til að nauðga henni.

„Fjórum mánuðum áður en þessi mynd var tekin var mér nauðgað á meðan ég var meðvitundarlaus.

Kvöldið áður en þessi mynd var tekin slapp ég naumlega frá nauðgun í annað sinn í lífinu.

Á myndina vantar marblettina á brjóstunum og kvíðahnútinn í maganum.“

Lögreglan ráðlagði henni að kæra ekki

Sunna, sem er 26 ára í dag, er tvítug á myndinni en fyrst var gerð tilraun til þess að nauðga henni þegar hún var unglingur.

„Það var tilraun sem misheppnaðist sem betur fer en það var lögreglumál frá fyrsta degi. Lögreglan kom á svæðið og bjargaði mér úr aðstæðunum þar sem ég var rænulaus,“ segir Sunna í samtali við Vísi. Hún segir lögregluna hafa verið inn í því máli allan tímann og meðal annars tekið af henni skýrslu.

„Mér var þá sagt að ég gæti kært en það væri svo erfitt og svo ólíklegt að ég ynni málið að mér var ráðlagt að gera það ekki. Ég vissi náttúrulega ekkert um nauðgunarmál eða þessa menningu svo ég tók þau bara á orðinu. Svo þegar þetta henti mig aftur seinna þá hvarflaði ekki að mér að kæra þar sem mín reynsla af réttarkerfinu væri sú að það væri ekki til neins,“ segir Sunna.

Hún segist sjá mikið eftir því að hafa ekki kært og vonast til að færsla sín verði meðal annars öðrum þolendum kynferðisofbeldis hvatning til að kæra, þó að það sé auðvitað erfitt.

Óskaði þess að hún hefði ekki verið svona full

Sunna segir þungu fargi af sér létt nú þegar hún hefur sagt opinberlega frá reynslu sinni en hún segist stíga fram vegna Druslugöngunnar og svo vegna þess mikla fjölda sem komið hefur fram undanfarna mánuði og greint frá alls kyns málum tengdum kynferðisofbeldi. Hún segist hafa fengið mikla hlýju og mikinn stuðning frá því hún setti færsluna inn í gærkvöldi, mun meiri en hún bjóst nokkurn tímann við.

Í færslu sinni segir Sunna að Druslugangan hafi veitt henni mikla huggun þegar hún var gengin fyrst árið 2011, en hún hefur komið að skipulagi göngunnar frá árinu 2013:

„Druslugangan var fyrst gengin árið eftir að mér var nauðgað, hún veitti mér mikla huggun og staðfesti trú mína á því að ég hefði ekki átt það sem kom fyrir mig skilið. Ég hafði lengi kennt sjálfri mér um allt, mundi að ég var í magabol í fyrsta skipti, stuttu pleðurpilsi hin tvö og varði miklum tíma í að óska þess að ég hefði ekki verið svona full, að ég hefði ekki tekið við drykkjum frá mönnum sem höfðu mögulega laumað einhverju í glösin, að ég hefði bara verið heima að læra eða sofandi… En það virkar ekki þannig.

Hvorki klæðaburður minn né ölvun mín afsakar hegðun ömurlegra manna sem sáu sér leik á borði þegar ég var minnimáttar.

Druslugangan veitti mér sjálfstraust til að byrja að tala um þessi mál og byrja að vinna úr þeim, fara í sálfræðimeðferð og vera sanngjörn við sjálfa mig.

En ég hef aldrei áður stigið fram og lagt öll mín mál á borðið og veit að ég hefði aldrei þorað því ef ekki væri fyrir byltinguna sem hefur átt sér stað undanfarna mánuði. Auðvitað þóttist ég alltaf vita að það væri ekki mitt að þegja, en það er erfitt að byrja að tala um þessa hluti og það er erfitt að stíga fram eftir mörg ár af samviskusamlegri þögn og eftir að gerendur hafa sumir hverjir haft mikið fyrir því að passa að ég þegði.

En ég mun ekki þegja, fokk þöggun, fokk ofbeldi, áfram druslur!

Ég er hætt að skammast mín, enda engin ástæða til.

Sjáumst í Druslugöngunni á laugardaginn!“

Druslugangan fer fram í fimmta sinn á laugardag og hefst klukkan 14. Gengið verður frá Hallgrímskirkju og niður á Austurvöll þar sem verða tónleikar og ræðuhöld. Sunna segir skipuleggjendur vonast eftir því að 20 þúsund manns mæti en í fyrra var metþátttaka þegar um 11 þúsund manns tóku þátt í göngunni.

Facebook-færslu Sunnu má sjá í heild sinni hér að neðan.

Ég er búin að skrifa þennan póst að minnsta kosti tuttugu sinnum á undanförnum árum og hætta við að þora að birta hann...

Posted by Sunna Ben on Monday, 20 July 2015