Ívar fyrstur til að stýra íslenska kvennalandsliðinu í 30 leikjum

Íslenska kvennalandsliðið í körfubolta leikur í kvöld sinn fyrsta leik í æfingaferð sinni til Danmerkur þegar liðið mætir heimastúlkum í Amagerhallen í Kaupmannahöfn.

Þetta er tímamótaleikur fyrir þjálfarann Ívar Ásgrímsson sem stýrir kvennalandsliðinu í þrítugasta sinn í leiknum í kvöld.

Mótið er haldið á vegum danska körfuknattleikssambandsins og leikur íslenska liðið fyrst tvo leiki gegn Danmörku og svo einn gegn Finnlandi á föstudaginn.

Ívar er sá þjálfari sem hefur oftast stjórnað kvennalandsliðinu en hann bætti met Sigurðar Ingimundarsonar og Torfa Magnússonar síðasta sumar.

Ívar hefur þjálfað kvennalandsliðið í tveimur skorpum. fyrst frá 2004 til 2005 og svo aftur síðan í fyrrasumar.

Tveir leikmenn íslenska liðsins í kvöld hafa tekið þátt í meira en helmingi leikja liðsins undir stjórn Ívars en það eru fyrirliðinn Helena Sverrisdóttir (21 leikur) og Bryndís Guðmunsdóttir (16).

Helenu vantar enn fjóra leiki til að ná Hildi Sigurðardóttur sem spilaði 25 af fyrstu 26 leikjum liðsins undir stjórn Ívars Ásgrímssonar.

Margrét Rósa Hálfdanardóttir, Sigrún Sjöfn Ámundadóttir, Gunnhildur Gunnarsdóttir

og Ragna Margrét Brynjarsdóttir spila allar sinn tíunda landsleik undir stjórn Ívars á móti Danmörku í kvöld.

Leikurinn í kvöld verður sá fjórði sem Ívar stýrir liðinu á móti Dönum en hann á enn eftir að vinna Dani sem landsliðsþjálfari.

Þjálfari danska liðsins er Hrannar Hólm en hann stýrði danska liðinu tvisvar til sigurs á móti Íslandi í æfingaleikjum hér á landi fyrir ári síðan.



Flestir leikir sem þjálfarar íslenska kvennalandsliðsins:

Ívar Ásgrímsson    29 (16 sigrar)

Sigurður Ingimundarson    22 (13)

Torfi Magnússon    22 (10)

Hjörtur Harðarson    9 (5)

Ágúst Björgvinsson    9 (1)

Henning Henningsson    8 (3)

Sverrir Þór Sverrisson    7 (4)

Jón Örn Guðmundsson    7 (3)

Guðjón Skúlason    6 (2)

Leikir og sigrar undir stjórn Ívars á móti ákveðnum þjóðum:

England        8 leikir (4 sigrar)

Malta        4 leikir (4 sigrar)

Lúxemborg    3 leikir (1 sigur)

Danmörk        3 leikir (0 sigrar)

Andorra        2 leikir (2 sigrar)

Skotland    2 leikir (2 sigrar)

Noregur        1 leikur (1 sigur)

Mónakó        1 leikur (1 sigur)

Gíbraltar    1 leikur (1 sigur)

Finnland    1 leikur (0 sigrar)

Aserbaijan     1 leikur (0 sigrar)

Svíþjóð        1 leikur (0 sigrar)

Austurríki    1 leikur (0 sigrar)

Flestir landsleikir spilaðir fyrir Ívar Ásgrímsson:

Hildur Sigurðardóttir    25

Helena Sverrisdóttir    21

Birna Valgarðsdóttir    20

Signý Hermannsdóttir    20

Alda Leif Jónsdóttir    20

María Ben Erlingsdóttir    19

Bryndís Guðmundsdóttir    16

Erla Þorsteinsdóttir    14

Erla Reynisdóttir    12

Sólveig Gunnlaugsdóttir    12

Rannveig Randversdóttir    11