Fundur BHM og ríkisins stendur enn yfir hjá sáttasemjara

Samninganefndir BHM og ríkisins hittust á fundi í Karphúsinu klukkan 9 í morgun. Um fyrsta fund deiluaðila í heila viku er að ræða en 10. vika verkfalls félagsmanna í BHM hófst á þriðjudag.

Páll Halldórsson, formaður samninganefndar BHM, segir í samtali við Vísi að fundurinn standi enn yfir.

„Við erum að ræða efnisatriði samnings, það er okkar hlutverk, og ríkið er núna að skoða málið hjá sér,“ segir Páll.

Hann segir enn bera nokkuð í milli deiluaðila og segist ekkert geta sagt til um það hvort eitthvað sé að draga saman með þeim.

„Fundurinn er bara ennþá í gangi og svo sjáum við hvernig honum lyktar.“