Hópur nemenda við Háskólann í Reykjavík vinnur nú að því að þróa sápu til hárþvottar sem unnin er úr kúahlandi.

Anton Reynir Hafdísarson, einn þeirra sem stendur að verkefninu, bendir á að áður fyrr hafi tíðkast að  dýfa hárinu ofan í kúahland.

„Það átti víst að vera mjög næringarríkt fyrir hárið því kúahland er ríkt vítamínum og steinefnum og er mjög hreinsandi. Við vildum prófa að nútímavæða þetta og settum okkur í samband við fólk sem er í sápugerð og sem bjuggu til uppskrift með okkur,“ segir Anton.

Fundið fyrir miklum áhuga
Anton segist að hópurinn hafi fundið fyrir miklum áhuga á sápunni. „Við höfum fengið fullt af fyrirspurnum eftir að við settum þetta á Facebook,“ segir Anton en hægt er að nálgast upplýsingar um verkefnið á Facebook síðu hópsins Qshampoo.  Nú er unnið að því að koma sápunni í verslanir hér á landi sem sérhæfa sig í að selja lífrænar vörur.

„Svo er aldrei að vita hvort ekki sé hægt að prófa að fara með þetta út ef það er einhver slíkur áhugi. Það er fullt af fólki sem vill hafa sápuna sína lífræna. Sápan hjá okkur kemur ekki nálægt neinum dýraprófunum og er mjög umhverfisvæn,“ segir Anton. 

Sápa úr hlandi ekki fyrir alla
Anton óttast ekki að almenningi muni lítast illa á að þrífa hárið á sér upp úr hlandi. „Ég er að nota þetta daglega núna. Mér finnst ekki neitt vera vont við þetta, það eru náttúrulega fleiri efni í sápunni en kúahland á borð við kókosolíu og sólblómaolíu. En þetta er ekki fyrir hvern sem er. Fólk mun líklega skiptast í tvo hópa. Þeir sem vilja prófa þetta og þeir sem ekki eru tilbúnir að setja hland í hárið á sér,“ segir hann.

Antoni finnist að eigin sögn lyktin af sjampóinu góð enda séu ýmis ilmefni í henni. Sumir hafi hins vegar sagst finna hlandlykt af henni. „Maður veit náttúrulega ekki hvort það sé af því það sé hlandlykt af henni eða af því þeir vita að það er hland í henni,“ segir Anton en bætir við að hópurinn sé að prófa sig áfram með hin ýmsu ilmefni við sápugerðina.