Bjarni biðst afsökunar

Bjarni Fritzson, spilandi þjálfari ÍR, hefur beðist afsökunar á ummælum sínum eftir leik Akureyrar og ÍR í átta-liða úrslitum Olís-deildar karla í handbolta á föstudaginn.

Í samtali við Vísi eftir leikinn, sem Akureyri vann 23-20 á heimavelli, vandaði Bjarni dómurum leiksins, þeim Gísla Hlyni Jóhannessyni og Hafsteini Ingibergssyni, ekki kveðjurnar og ásakaði þá m.a. um dónaskap.

„Þeir eru á tíma að flauta okkur út úr þessum leik. Þetta eru 8-liða úrslit sem að við höfum verið að berjast fyrir í allan vetur og svo fáum við svona. Þetta er ekki ásættanlegt.

„Það er ekki hægt að bjóða mönnum sem leggja svona mikla vinnu í veturinn upp á svona dómara," sagði Bjarni eftir leikinn en hann var m.a. ósáttur með rauða spjaldið sem Jón Heiðar Gunnarsson fékk að líta.

„Síðan er ekki hægt að tala við þá. Þeir eru bara með dónaskap og henda mönnum hérna útaf með rautt spjald þegar menn eru að reyna að fá útskýringu einhverju, sem er alveg ótrúlegt.

„Þetta var bara slæmur árekstur, þetta er bara einn dómur af fjölmörgum. Þetta er það ótrúlegasta sem ég hef séð.Þeir dæma eitthvað öðru megin, og allt annað hinum megin – ekkert samræmi. Það er mjög leiðinlegt að upplifa að maður sé að spila leik sem er ekki sanngjarn og heiðarlegur.“

Bjarni baðst í gær afsökunar á þessum ummælum á Facebook-síðu sinni en færslu hans má lesa í heild sinni hér fyrir neðan.

„Ein af mínum vinnureglum sem þjálfari er að gagnrýna ekki dómarar í fjölmiðlum. Ástæðan fyrir því er sú að ég tel að það þjóni ekki neinum tilgangi og sé aðeins til þess fallið að skapa gjá milli dómara og leikmanna.

„Persónulega finnst mér að dómarar, leikmenn og þjálfarar eigi að vinna saman að því að gera leikinn eins góðan og hægt er, enda eru allir að vinna að sama markmiði.

„Í gær braut ég þessa vinnureglu í fyrsta sinn í langan tíma og gagnrýndi þá góðu drengi Gísla og Hafstein opinberlega.

„Þrátt fyrir að ég hafi ekki verið 100% sáttur með þeirra frammistöðu þá sé ég eftir því að hafa tekið svona hart til orða.

„Það er hægt að skrifa þetta á keppnisskapið, hitan í augnablikinu osfrv. en það er samt engin afsökun. Gísli og Hafsteinn eru reynslumiklir dómarar og eiga betra skilið.

„Ég vona að fólk fari nú að snúa sér að einhverju öðru jákvæðara og skemmtilegra allaveganna höfum við strákarnir í ÍR gert það. Því okkar bíður skemmtilegt og spennandi verkefni strax á morgun sem við erum fullir tilhlökkunar yfir.

„Að lokun langar mig að hvetja alla ÍR ingar til að mæta upp í Berg á morgun til að styðja liðið. Við munum selja okkur dýrt og gefa allt sem við eigum til þess að komast áfram.

„Bestu kveðjur Bjarni Fritz.“

ÍR og Akureyri mætast í oddaleik í Austurbergi seinna í dag. Leikurinn hefst klukkan 16:00 og verður í beinni textalýsingu á Vísi.