Guif þarf að fara í oddaleik

Atli Ævar Ingólfsson skoraði þrjú mörk er Guif tapaði fyrir Redbergslid, 26-23, í 8-liða úrslitum úrslitakeppni sænsku úrvalsdeildarinnar í kvöld.

Guif hefði með sigri tryggt sér sæti í undanúrslitunum en Redbergslid náði með sigrinum að knýja fram oddaleik í rimmunni. Staðan í henni er nú 2-2.

Aron Rafn Eðvarðsson stóð í markinu hjá Guif í leiknum en Kristján Andrésson er þjálfari liðsins. Sigur heimamanna var nokkuð öruggur en eftir jafnan fyrri hálfleik náði Redbergslid að síga fram úr um miðjan síðari hálfleik.