Aðeins þrír hlaupið meira en Gylfi Þór á tímabilinu

James Milner, miðjumaður Manchester City, hefur spilað vel að undanförnu, en hann skoraði í öðrum leiknum í röð þegar meistararnir unnu Stoke, 4-1, á miðvikudaginn.

Milner hafði ekki skorað í tveimur leikjum í röð í tæpan áratug fyrir miðvikudagskvöldið, en það var ekki það eina merkilega við þann leik fyrir enska miðjumanninn.

Milner setti nýtt met í dugnaði á tímabilinu, en hann hljóp meira í þeim leik en nokkur annar hefur gert í einum leik ensku úrvalsdeildinni á leiktíðinni.

Samkvæmt leikmannatölfræði EA Sports, opinberri og ítarlegri tölfræðisamantekt úrvalsdeildarinnar yfir frammistöðu leikmanna, hljóp Milner 13,56 km í sigrinum gegn Stoke.

Með þessari frammistöðu rétt skreið hann yfir George Boyd, leikmann Burnley, sem er að öðrum ólöstuðum duglegasti leikmaður úrvalsdeildarinnar.

Boyd átti metið á leiktíðinni þegar hann hljóp 13,55 km í leik gegn Newcastle, en þessi gríðarlega vinnusami leikmaður kemur fjórum sinnum fyrir á topp 10 listanum yfir mestu hlaupalengdirnar í einum leik á tímabilinu.

Gylfi Þór Sigurðsson, leikmaður Swansea og íslenska landsliðsins, er í sjöunda sæti listans eftir frammistöðu sína gegn Manchester United í fyrstu umferð deildarinnar.

Fyrir utan að skora sigurmarkið í þeim leik hljóp Gylfi Þór 13,18 km, en bara George Boyd, James Milner og Tom Carroll, sem hljóp 13,47 km í leik með Swansea gegn Southampton í byrjun mánaðarins, eru fyrir ofan okkar mann.

Tíu mestu hlaupalengdir leikmanns í einum leik á tímabilinu:

James Milner, Man. City - Stoke, 13,56 km

George Boyd, Burnley - Newcastle, 13,55 km

Tom Carroll, Swansea - Southampton, 13,47 km

George Boyd, Burnley - Stoke, 13,34 km

George Boyd, Burnley - Aston Villa, 13,24 km

Gylfi Þór Sigurðsson, Swansea - Man. Utd, 13,18 km

Christian Eriksen, Tottenham - Swansea, 13,12 km

Marouane Fellaini, Man. Utd - Southampton, 13,12 km