Guðjón Valur skoraði þrjú mörk í toppslagnum

Barcelona fór frekar illa með lærisveina Arons Kristjánssonar í Kolding í kvöld.

Þetta var toppslagur í B-riðli og úrslitaleikur um toppsætið í riðlinum. Kolding átti aldrei möguleika gegn ofurliði Barcelona sem vann 33-27.

Munurinn var tíu mörk í síðari hálfleik en Börsungar slökuðu talsvert á klónni seinni hluta hálfleiksins.

Guðjón Valur Sigurðsson átti fínan leik fyrir Barcelona og skoraði þrjú mörk. Hann var settur í hvíld á bekkinn er seinni hálfleikur var hálfnaður. Þá var löngu búið að afgreiða leikinn.

Barcelona er með þrem stigum meira en Kolding og Flensburg og þar með búið að vinna riðilinn.