Gústaf komið víða við: Telur samkynhneigð óeðlilega og íslam ekki eiga heima á Íslandi

„Það hefur löngum verið þekkt að sumt fólk leggur ást á sitt eigið kyn, en það er ekki þar með sagt að slík háttsemi sé eðlileg, heldur þvert á móti.“

Þetta skrifaði Gústaf Níelsson í Morgunblaðið í desember 2005 þar sem hann gagnrýndi harðlega frumvarp sem lagt hafði verið fram á Alþingi um að heimila skyldi hjónaband samkynhneigðra. Greinin ber heitið „Að elska sitt eigið kyn.“

Skipan Gústafs sem varamanns Framsóknar og flugvallavina í mannréttindaráð Reykjavíkur hefur vakið mikla athygli. Gústaf er menntaður sagnfræðingur, hann er flokksbundinn sjálfstæðismaður og hefur tekið virkan þátt í starfi flokksins. Árið 1991 var hann skipaður framkvæmdastjóri þingflokks Sjálfstæðisflokksins og gegndi því starfi í um tvö ár.

Lítið fór fyrir Gústafi á seinni hluta 10. áratugs seinustu aldar en það sama verður ekki sagt um seinustu ár. Hann lét meðal annars til sín taka í umræðunni um vændismál árið 2003 í tengslum við frumvarp Kolbrúnar Halldórsdóttur til laga um vændi. Þá sinnti Gústaf sérverkefnum fyrir nektardansstaðinn Bohem.

„Það var aldrei meiningin að leiða hið afbrigðilega og ófrjóa til öndvegis“

Gústaf hóf störf sem dagskrárgerðarmaður á Útvarpi Sögu árið 2004 og stýrði tveimur daglegum þáttum, Bláhorninu og Síðdegisspjallinu.

Í ágúst 2005 tilkynnti Gústaf um það í Bláhorninu að hann hygðist taka þátt í prófkjöri Sjálfstæðisflokksins í Reykjavík fyrir borgarstjórnarkosningarnar 2006. Gústaf sóttist eftir 8. sæti á listanum og sagði í viðtali við DV að stefnumál sín væru „klassísk sveitarstjórnarmál“ og að hann ætlaði að setja málefni fjölskyldunnar og eldra fólks á oddinn.

„Ég styðst við þau gildi sem dugað hafa þjóðinni best í gegnum tíðina,“ sagði Gústaf meðal annars. Þá kvaðst hann vera af „klassískum skóla sjálfstæðismanna“ og taka skoðanir sínar og gildi úr íslenskum veruleika. 

Síðar sama ár skrifaði Gústaf svo fyrrnefnda grein í Morgunblaðið um lagafrumvarp varðandi hjónaband samkynhneigðra. Hann sagði frumvarpið vart eiga sér hliðstæðu í kristnum samfélögum Vesturlanda:

„En hin kristnu samfélög Vesturlanda eru frjálslynd og umburðarlynd. Þau skilja að sum okkar eru öfugsnúin og afbrigðileg og láta refsilaust í dag, enda kærleiksboðskapurinn grunntónn í trúnni. En fyrr má nú rota en dauðrota, það var aldrei meiningin að leiða hið afbrigðilega og ófrjóa til öndvegis.“

Lagði til að Ísland bannaði hin íslömsku trúarbrögð

Gústaf hefur svo undanfarin misseri sætt harðri gagnrýni fyrir ummæli sín í garð múslíma en hann hefur meðal annars lýst því yfir opinberlega að hann sé á móti mosku í Reykjavík. 

Á síðasta ári lagði Gústaf til að Ísland bannaði hin íslömsku trúarbrögð og setti þannig fordæmi fyrir alla Evrópu. Í viðtali í útvarpsþættinum Harmageddon í maí síðastliðnum sagðist hann telja mikilvægt að standa vörð um kristin gildi  Íslendinga. Þá lýsti hann áhyggjum af því að reist yrði moska í Reykjavík.

„Ísland er síðasta kristna vígið, og það er að falla. Það er bara þannig“ sagði Gústaf í viðtalinu og hélt áfram: „Eru það fordómar að hafa þessa skoðun að það sé ekki heppilegt að fylla landið af múslimum?“

Gústaf var svo gestur í Bítinu á Bylgjunni fyrr í þessum mánuði þar sem hann ræddi við Þorleif Gunnlaugsson, fyrrum borgarfulltrúa Vinstri grænna, um hryðjuverkin í París. Þar var Gústaf spurður hvort hann vildi banna íslam á Íslandi:

„Ég myndi að minnsta kosti vilja taka þá umræðu.“