Dæmi þess að nýfædd börn séu skráð í Búseta

517 gengu í Búseta í fyrra í samanburði við 420 árið 2012. Dæmi eru um að foreldrar skrái nýfædd börn í félagið. Búseti stendur vel og hyggst fjölga íbúðum úr 750 í 1.250 á höfuðborgarsvæðinu að því er segir í tilkynningu frá félaginu.

Umsóknir um aðild að Búseta hafa aldrei verið fleiri en í fyrra þegar 517 manns gengu í félagið, tæplega 100 fleiri en tveimur árum áður. Búseti á um 750 íbúðir á höfuðborgarsvæðinu og er búist við að þeim fjölgi um 500, eða 67%, á næstu árum.

„Fasteignaverð hefur farið hratt hækkandi undanfarin misseri og hefur sú þróun gert fólki sífellt erfiðara fyrir að kaupa sér húsnæði. Kann það að skýra aukna ásókn í íbúðir Búseta en kaup á búseturétti krefst yfirleitt minna eiginfjárframlags en kaup á íbúð. Eftir að gengið hefur verið frá kaupunum á búseturétti er greitt mánaðargjald sem byggir á kostnaði og er yfirleitt talsvert lægra en almennt leiguverð. 517 manns sóttu um aðild að Búseta í fyrra, 492 árið áður og 420 árið 2012. Búseti auglýsir að jafnaði 4 búseturétti til sölu á mánuði,“ segir í tilkynningunni.

Fólki með ný félagsnúmer er einnig úthlutað íbúum

Stór hluti félagsmanna Búseta eru eldri en 50 ára en færst hefur í vöxt að ungt fólk sæki um aðild að Búseta og er þá sérstaklega um að ræða fólk sem búið hefur erlendis og þekkir fyrirkomulag húsnæðissamvinnufélaga þaðan.

„Þegar íbúðum Búseta er úthlutað er m.a. litið til þess hversu lengi umsækjendur hafa verið félagsmenn og því þekkjast dæmi þess að foreldrar skrái nýfædd börn sín í félagið. Árafjöldi í félaginu er aðeins einn af þáttunum sem skoðaðir eru og fær fólk með ný félagsnúmer einnig úthlutað íbúðum.“

Búseti er stærsta húsnæðissamvinnufélag landsins. Það er í eigu félagsmanna og er rekið án hagnaðarsjónarmiða.

Margir þekkja kerfið frá Norðurlöndum

„Greint hefur verið frá því að hluti smærri húsnæðissamvinnufélaga hér á landi eigi í rekstrarerfiðleikum en rekstur Búseta hefur verið mjög stöðugur. Félagið stendur vel fjárhagslega og má það m.a. rekja til þess að farið hefur verið varlega í uppbyggingu þess allt frá stofnun 1983. Félagið hélt að sér höndum á árunum fyrir hrun en er nú að sækja í sig veðrið í kjölfar aukinnar ásóknar.“

Gísli Örn Bjarnhéðinsson, framkvæmdastjóri Búseta, telur að þessi fjögun í félaginu eigi sér tvær meginskýringar.

„Annars vegar er stór hópur fólks sem fær ekki fjármögnun á þá íbúðarstærð sem það vantar og hins vegar fólk sem þekkir einhvern í Búseta og er hrifið af sveigjanleikanum sem þetta form veitir. Margir reyndar líka sem hafa búið á Norðurlöndunum þar sem stór hluti húsnæðis er í þessu kerfi.“