Unglingsstelpur eru aðalmálið

„Þetta er svo kúl aldur, þær eru svona alveg í einhverju fullkomnu millibilsástandi. Eru meðvitaðar en langt frá því að vera fullorðnar og einhvern veginn ekki enn þá börn,“ segir danshöfundurinn og dansarinn Ásrún Magnúsdóttir, sem vinnur nú að nýju dansverki og leitar að unglingsstelpum sem hafa áhuga á að taka þátt í verkefninu.

Verkið ber vinnuheitið Teenage Girls og að sögn höfundarins fjallar það um að vera unglingsstelpa í dag, en sá hópur samfélagsins veitir henni mikinn innblástur.

„Það er aðallega af því að ég hef verið að kenna unglingsstelpum í allan vetur og hef verið svo inspíreruð af þeim. Svo er The Virgin Suicides ein uppáhaldsmyndin mín.“

Hún segir tengslin við unglingsstelpur þó aðallega myndast af því að hún hafi sjálf verið ein slík á ákveðnum tíma í sínu lífi og langi til þess að gefa þeim rödd. „Þótt ég sé enginn sérfræðingur í unglingsstelpum þá hef ég verið slík sjálf og það erum við sem höfum verið það og þær sem eru það í dag sem erum eina fólkið sem veit hvernig það er,“ segir hún hress.

Að undanförnu hefur Ásrún undirbúið verkefnið með því að skrifa niður ýmiss konar minningar frá sínum unglingsárum og segir það áhugavert hversu mörg atvik og aðstæður séu sameiginleg upplifun allra þeirra sem gengið hafa í gegnum þetta tímabil.

„Ég hef verið að skrifa alls konar minningar frá unglingsárunum og svo las ég þetta upp fyrir hóp af fólki og það voru mjög margar fyrrverandi unglingsstelpur sem tengdu við það,“ segir Ásrún hress og bætir við að hún muni mögulega nota eitthvað af eigin upplifunum og minningum í verkið, en hún hefur einnig verið í samstarfi við sumarbúðaverkefnið Stelpur rokka. „Planið er að búa til eina risastóra unglingsstelpuhljómsveit sem dansar, syngur, spilar og performerar, allt í senn.“

Þær stelpur og foreldrar þeirra sem hafa áhuga á að taka þátt í verkefni Ásrúnar geta sent henni póst á netfangið asrunm@gmail.com. Engin krafa er gerð á reynslu af því að dansa, leika eða spila á hljóðfæri, einungis áhugi á því að koma fram.