Breytingar gerðar á lokunarsvæðinu umhverfis Holuhraun

Breytingar hafa verið gerðar á lokunarsvæðinu umhverfis Holuhraun. Nýja lokunarsvæðið nær nú um tuttugu metra út fá jaðri nýja hraunsins, Dyngjujökli í suðri, farvegi Jökulsár á Fjöllum í austri og vestustu kvíslar Jökulsár á Fjöllum í vestri.

Þetta kemur fram í tilkynningu frá almannavörnum. Ákvörðunin var tekin út frá hættumati Veðurstofu Íslands þar sem fjallað er um hættur á svæðinu. Þar leggur Veðurstofa Íslands einnig til að farið verði í mótvægisaðgerðir til að auka öryggi almennings í nágrenni hins nýja lokunarsvæðis.

Lögreglan mun í samstarfi við Vatnajökulsþjóðagarð vera með viðveru á svæðinu til þess að gæta öryggis og vinna náið með vakt Veðurstofunnar, að því er fram kemur í tilkynningunni. Stefnt er að því að koma upp frekari mælibúnaði sem tengdur er vöktunarkerfi Veðurstofunnar og auka þannig vöktun á svæðinu svo gefa megi út viðvaranir verði talin ástæða til.

Þá mun Vatnajökulsþjóðgarður hnitsetja og merkja áhugaverða útsýnisstaði fyrir ferðamenn, þar sem aðgengi er auðvelt og fljótlegt að rýma svæðið ef ástæða verður til.