Desemberspá Siggu Kling – Fiskur: Mundu eftir því að anda

Elsku ómótstæðilegi fiskurinn minn. Allt sem þú veitir athygli stækkar svo um munar. Í þessum mánuði skaltu veita því sem lætur þér líða vel athygli og hafa fókusinn á því. Hugsanir skapa heiminn og þú skapar hugsanirnar þínar, það er bara þannig.

Ekki hugsa of mikið fram í tímann því þá gleymir þú að láta þér líða vel á aðventunni og það er ekki sexí.

Jólin og aðventan eru þinn tími, allt þarf að vera svo fallegt og fullkomið og þú hugsar: Ég þarf að klára þetta, ég þarf að klára hitt. Stoppaðu hér og andaðu, það er nefnilega það merkilegasta sem maður gerir. Að anda.

Það sem þú þarft að að klára fyrir jólin gengur 100 prósent upp og hitt sem þú sleppir að gera eða nærð ekki að gera skiptir ekki máli og hefur enga merkingu í þessum mánuði, mundu það. Einhvers staðar í kringum þig er manneskja sem er engill og hún vísar þér rétta leið.

Það er að koma tími þar sem þú finnur að þú ert að fara að rísa og þú færð trúna á sjálfan þig og ást á svo mörgu. Ekki tala um hlutina sem þér líður illa yfir við þá sem slúðra því þá kallarðu á dramadrottninguna ógurlegu og hún hneppir þig í tilfinningavesen, einbeittu þér frekar að því að tala um það sem gleður þig. Orð eru álög, mundu það, hjartans fiskurinn minn.

Það eru svo hreinar tilfinningar sem streyma inn í hjartað á þér í desember að þú ferð hreinlega að gráta af gleði. Leiðinda álögin eru rofin og þú faðmar hið ólíklegasta fólk að þér.

Sendu jólakveðjur og kort ef þú getur, þú ert að fara að gleðja svo marga með þér í mánuðinum. Ástin magnast til góða og ef blessuð ástin er ekki góð þá mun hún magnast og springa út því þessi mánuður hreinsar svo margt óþarft í burtu með Jóla-Ajaxinu!

Mottó verða aldrei gömul, hér vel ég tvö sterk sem þú hefur fengið áður og þau eru að sjálfsögðu enn í gildi í desember þannig að þú skalt hafa þau hugföst í mánuðinum:

Ég stjórna þessari bíómynd sem heitir lífið.

Ég horfi til himins og ber höfuðið hátt.

Knús og koss Sigga Kling

Frægir fiskar: Elísabet Ásberg listamaður, Diana Omel listamaður, Beggi hans Pacasar, Baltasar Kormákur leikstjóri, Díana Ómel fjöllistakona, Árni Johnsen, fyrrverandi þingmaður, Albert Einstein, Sigmundur Davíð Gunnlaugsson forsætisráðherra, Vigdís Hauksdóttir þingkona, Ilmur Kristjánsdóttir leikkona, Svavar Örn engill, Páll Óskar poppstjarna.