Skeljagrandabróðir sýknaður af báðum frelsissviptingunum

Kristján Markús Sívarsson, sem í gær var dæmdur í fjögurra ára og níu mánaða fangelsi í Héraðsdómi Reykjaness, var sýknaður af báðum þeim frelsissviptingum sem hann var ákærður fyrir. Hann var aftur á móti sakfelldur fyrir líkamsárás í báðum málunum.

Kristján, sem ásamt bróður sínum Stefáni Loga er oft kenndur við götuna Skeljagranda þar sem þeir bjuggu áður, var sakborningur í mörgum ákærum sem reknar voru í sama málinu fyrir héraðsdómi. Ákærurnar sem mesta athygli vöktu voru þær sem sneru að meintu frelsissviptingunum tveimur. Þær áttu að hafa átt sér stað í fyrra, annars vegar í Vogum á Vatnsleysuströnd og hins vegar í Kópavogi.

Frásögn drengsins af atburðunum í Vogum varhugaverð

Í dómsorðum segir að það liggi fyrir að nítján ára drengurinn sem sagði Kristján og tvo aðra hafa haldið sér föngnum í Vogum á Vatnsleysuströnd hafi komið þangað óþvingaður og að engin sönnun sé um að honum hafi verið haldið nauðugum eftir veru hans þar. Ekki liggi fyrir að honum hafi verið varnað útgöngu og voru mennirnir þrír því sýknaðir af brotum gegn 226. grein almennra hegningarlaga, sem varðar frelsissviptingu. Jafnframt var ekkert í málinu talið færa sönnur á að mennirnir hefðu reynt að kúga fé úr drengnum.

Hins vegar fellst dómurinn á að Kristján og félagar hefðu nýtt sér aflsmun og hræðslu piltsins og að það hafi verið til þess fallið að valda honum ótta um að honum hafi ekki verið frjálst að fara af staðnum. Háttsemi þeirra hafi þannig varðað við 225. grein almennra hegningarlaga, þar sem meðal annars segir að hótun um frelsissviptingu eða ofbeldi geti varðað sektum eða fangelsi allt að tveimur árum.

Drengurinn gaf hreint út sagt ófagrar lýsingar fyrir dómi á því ofbeldi sem hann átti að hafa sætt af höndum mannanna þriggja í Vogum:

„Ég get ekki sagt nákvæmlega í hvaða röð þetta gerðist en ég get sagt hvað gerðist. Hinir strákarnir voru með rafbyssuna en Diddi [Kristján Markús] var mest að kýla mig. Svo lætur Diddi mig sleikja frunsu sem er framan í honum. Þeir láta rafbyssu á kynfæri mín þannig að ég pissa á mig. Svo láta þeir mig sleikja hundapiss á gólfinu, hrækja á gólfið og láta mig sleikja það,” sagði pilturinn meðal annars.

Héraðsdómur taldi drenginn ekki trúverðugan í framburði sínum en hann bar fyrir dómi að hafa verið í töluverðri fíkniefnaneyslu. Mennirnir neituðu því allir að hafa gert drengnum að sleikja upp hráka, piss og fleira og segir í dómsorðum að frásögn drengsins þyki þannig varhugaverð. Ekki þótti heldur sannað að mennirnir hefðu neitt hann til að drekka smjörsýru.

Hinsvegar taldist sannað að drengurinn hefði verið sleginn og rafbyssunni beitt á hann. Það þótti hafið yfir skynsamlegan vafa að Kristján Markús hefði slegið drenginn ítrekað og var hann sakfelldur fyrir þá líkamsárás. Hinir tveir voru sakfelldir fyrir að hafa beitt rafbyssunni.

Sló mann í andlitið og stakk hann með skærum

Kristján var einnig ákærður fyrir að hafa ráðist inn á heimili manns í Kópavogi í fyrra ásamt þeim Ríkharði Júlíusi Ríkharðssyni og Marteini Jóhannssyni, sem báðir hlutu fangelsisdóm í gær. Var þeim þremur gefið að sök að hafa ráðist á manninn með höggum og spörkum og svipt hann frelsi sínu í allt að eina og hálfa klukkustund.

Kristján var sakfelldur fyrir stórfellt líkams- og heilsutjón í skilningi 218. greinar almennra hegningarlaga fyrir að hafa meðal annars slegið manninn í andlitið og stungið hann nokkrum sinnum með skærum í upphandlegg hans. Hann var þó ekki sakfelldur fyrir að hafa slegið manninn með Play Station leikjatölvu í andlitið.

Mennirnir voru hinsvegar allir þrír sýknaðir af ákærum um frelsissviptingu, þar sem dómurinn taldi ekki liggja fyrir í málinu að maðurinn hafi verið bundinn eða læstur inni, eða þremenningarnir neitað honum að fara. Þeir voru sakfelldir fyrir rán fyrir að hafa tekið muni af heimili mannsins í framhaldi af líkamsmeiðingunum.