Útrýma fitufordómum í fjölmiðlum

„Í ár var Dagur líkamsvirðingar nýttur til að vekja fjölmiðla til umhugsunar um áhrif sín. Fjölmiðlar hafa gríðarleg áhrif á samfélagið og því fannst okkur liggja vel við að halda upp á daginn með því að teygja út höndina til þeirra,“ segir Sigrún Danielsdóttir sálfræðingur og formaður samtakanna Líkamsvirðing. Samtökin héldu upp á daginn í annað skiptið í gær, föstudaginn þrettánda, og fögnuðu með því að bjóða fjölmiðlafyrirtækjum upp á ókeypis fræðslu, sem tekið var vel í að hennar sögn. „Með þessu erum við að reyna að koma mikilvægum upplýsingum til fjölmiðla, sem eru jú partur af vandanum,“ útskýrir Sigrún og heldur áfram: „Fjölmiðlar skipa veigamikinn sess í samfélagsmótun. Neikvæð kerfisbundin umfjöllun um holdafar er staðreynd samkvæmd rannsóknum og það ber að taka alvarlega. Við stjórnum nefnilega hversu mikla útlitsdýrkun og fitufordóma við viljum hafa í samfélaginu okkar.“ Sigrún bendir á að margt spili inn í, svo sem myndaval með fréttum sem og hvernig fitufordómar endurspeglast í skrifum. Samfélagsbætandi starf Samtökin hafa verið starfandi síðan árið 2012 en baráttan á sér lengri sögu og teygir sig allt aftur til ársins 2006 með upphafi Megrunarlausa dagsins á Íslandi. „Ég hafði alltaf haft áhuga á að vinna með samfélagið okkar og langaði að gera eitthvað markvisst til að sporna gegn þeim fitufordómum, megrunarþráhyggju og útlitsdýrkun sem voru til staðar.“ Á þeim tíma fór lítið fyrir hugtökunum meðal almennings. „Á þessum stutta tíma hafa ótrúlegar breytingar átt sér stað sem endurspeglast meðal annars í að nú eigum við orðaforða yfir þetta, sem áður var ekki til staðar.“ Líkamsvirðing fyrir alla En samtökin vilja ekki aðeins eiga í þessu samtali við fjölmiðla, heldur eiga þau mikilvægt erindi við almenning. „Við viljum fá fólk til að vera meðvitað um að hugsa fallega til líkama síns, óháð vaxtarlagi. Líkaminn er ekki óvinur og alls ekki ótemja sem sífellt þarf að stjórna, heldur umgangast af kærleika,“ bætir Sigrún við í lokin. gudrun@frettabladid.is