Jakob öflugur í öruggum sigri

Jakob Örn Sigurðarson skoraði 21 stig er lið hans, Borås Basket, vann öruggan sigur á ítalska liðinu FoxTown Cantu, 101-81, í riðlakeppni FIBA Europa Cup í kvöld.

Þetta var fyrsti leikur liðanna í keppninni en Le Havre frá Frakklandi og Kapfenberg Bulls frá Austurríki eru í sama riðli. Að minnsta kosti tvö efstu liðin fara áfram í 32-liða úrslit keppninnar og sigurinn í kvöld var því mikilvægur.

Jakob spilaði í 32 mínútur í leiknum og nýtti alls átta af þrettán skotum sínum í leiknum, þar af þrjú af fjórum þriggja stiga skotum sínum. Hann gaf tvær stoðsendingar og tók eitt frákast.

Jakob Örn skipti yfir til Borås frá Sundsvall Dragons í sumar þar sem hann spilaði í fjögur ár og varð einu sinni Svíþjóðarmeistari.

Næsti leikur Borås í keppninni verður gegn Kapfenberg Bulls í Austurríki í næstu viku.