„Virðist sem ríkið sé ekki að hlusta“

Allt bendir til þess að hundruð félagsmanna BHM muni leggja niður störf á mánudag. Samningafundi félagsins við ríkið lauk um klukkan hálf fimm í dag, án árangurs, og er næsti fundur boðaður á mánudag klukkan hálf fjögur. Lítið hefur þokast í viðræðunum síðustu daga og engin lausn í sjónmáli, að sögn Ernu Guðmundsdóttur, lögmanns og fulltrúa í viðræðunefnd BHM.

„Það er grafalvarleg staða uppi. Verkfallið á mánudag mun hafa verulegar afleiðingar í för með sér og það er ekki hægt að fá ríkið að samningaborðinu af alvöru að okkar mati,“ segir Erna í samtali við Vísi og bætir við að óskað hafi verið ítrekað eftir því að funda um helgina.

Íhuga að boða til fleiri verkfalla

Hún segir að enn sem komið er hafi ríkið ekki lagt fram tilboð. Hvað varðar kröfur félagsmanna BHM segir hún engin skilyrði hafa verið sett önnur en þau að menntun verði metin til launa.

„Það er mikil samstaða hjá öllum stéttum innan BHM sama hvort þær eru í verkfalli eða ekki. Þannig að við erum að íhuga hjá hvaða fleiri stofnunum ríkisins eigi að boða til verkfalla meðal félagsmanna, því það virðist sem ríkið sé ekki að hlusta,“ ssegir Erna.

Dýralæknar munu fara í ótímabundið verkfall á miðnætti 20.apríl, sem og starfsmenn Matvælastofnunar; félagsmenn í Félagi íslenskra náttúrufræðinga og matvæla- og næringarfræðingar stofnunarinnar munu háskólamenn hjá fjársýslu ríkisins fara í tímabundið verkfall til föstudagsins 8. maí.

„Við reynum að vera bjartsýn en erum gífurlega áhyggjufull að geta ekki farið í að finna lausn með viðsemjendum okkar fyrr en eftir langt helgarfrí.“