Bjarni Ben: Aldrei betur gert við aldraða og öryrkja

Forseti Íslands boðaði árlegan ríkisráðsfund klukkan tíu í morgun. Það var því enn niðamyrkur þegar ráðherrar tíndust í hús inn úr hríðinni í sínu fínasta pússi. Fór ekki betur en svo að iðnaðarráðherra missti af sér skóinn eins og sjálf öskubuska.

Bjarni Benediktsson fjármálaráðherra sagðist ekki eiga von á öðru en vinsamlegum fundi með forseta Íslands, þrátt fyrir að hann hafi rétt fyrir jól brugðist illa við þegar Ólafur Ragnar gagnrýndi þá ákvörðun stjórnarmeirihlutans að hafna breytingatillögu við fjáraukalög sem hefði hækkað bætur aldraðra og öryrkja afturvirkt.

9,7% hækkun bóta einsdæmi

„Mér fannst ástæða til að tjá ig um þegar menn eru að gagnrýna þá niðurstöðu þegar við erum í raun og veru aldrei í lýðveldissögunni að gera meira og betur við þá sem eiga þarna undir," sagði Bjarni á tröppum Bessastaða í morgun."

Bjarni sagði að um viðkvæman málaflokk væri að ræða sem leiddur hafi verið til lykta á réttum vettvangi, þ.e.a.s. á þinginu.

„Ég hef staðið í margar vikur í umræðum um það hvað ríksistjórnin er að gera vel, 2% verðbólga og hækka bætur nú um áramótin um 9,7%, það er í raun og veru einsdæmi, að maður skuli ekki andmæla því þegar menn segja að það sé hálfgerð þjóðarskömm hvernig málum er komið í þeim málaflokki. Það væri þá eitthvað annað ef fjármálaráðherra léti ekki heyra í sér," sagði Bjarni.

Líklegast að engin stólaskipti verði

Oddvitar ríkisstjórnarflokkanna höfðu gefið því undir fótinn að hugsanlega yrði stokkað upp í ríkisstjórninni um áramótin. Af því varð þó ekki í dag útlit fyrir að sömu tíu ráðherrar sitji þá fimmtán mánuði sem eftir eru af kjörtímabilinu.

„Það er langlíklegast úr þessu, en maður skal aldrei segja í pólitík," sagði Bjarni.