Mögulega stokkað upp í ríkisstjórn á gamlársdag

Ekki er útilokað að breytingar verði á ráðherraskipan í ríkisstjórninni á ríkisráðsfundi á Bessastöðum á gamlársdag. Oddvitar beggja stjórnarflokka hafa gefið í skyn að stokkað verði upp í ríkisstjórninni um áramótin.

Níu ráðherrar sátu í fyrsta ráðuneyti Sigmundar Davíðs Gunnlaugssonar að honum meðtöldum sem tók við völdum á Bessastöðum hinn 23. maí árið 2013, sex karlar og þrjár konur. Umdeilt var í upphafi að ekki skyldi skipaður sérstakur umhverfisráðherra og að ráðneytið skyldi vera í höndum Sigurðar Inga Jóhannssonar vegna þess að hann væri einnig sjávarútvegs- og landbúnaðarráðherra.

Fyrsta breytingin sem gerð var á ríkisstjórninni var þó ekki tengd þessari stöðu, heldur hrökklaðist Hanna Birna Kristjánsdóttir úr ríkisstjórn eftir margra mánaða vandræðaganga vegna lekamálsins svo kallaða hinn 4. desember á síðasta ári. Hún hafði þá aðeins setið í ráðherrastóli í 19 mánuði og tók Ólöf Nordal sæti hennar í innanríkisráðuneytinu hinn 4. desember 2014.

Á ríkisráðsfundi á gamlársdag það ár bættist ríkisstjórninni síðan liðsauki þegar Sigrún Magnúsdóttir tók við umhverfismálunum úr höndum Sigurðar Inga. Bæði Sigmundur Davíð Gunnlaugsson forsætisráðherra og Bjarni Benediktsson fjármálaráðherra hafa gefið því undir fótinn að breytingar gætu orðið á ríkisstjórninni á hefðbundnum fundi í ríkisráði á Bessastöðum næst komandi fimmtudag. Jafnvel að flokkarnir skiptist á einhverjum ráðuneytum. Þá eru 15 mánuðir eftir af kjörtímabilinu. 

Ef einhver yfirgefur ríkisstjórnina hefur Illugi Gunnarsson menntamálaráðherra verið talinn líklegastur. Forystumenn stjórnarflokkanna eru hins vegar þöglir sem gröfin hvað þetta varðar. Hver niðurstaðan verður kemur í ljós innan sólarhrings.