Kennarar ganga úr tíma og til fundar

Boðað er til fundar kennara í öllum framhaldsskólum landsins á mánudaginn.

Kennsla mun vera með venjubundnum hætti þennan dag en klukkan 11.05 er ætlunin að kennarar leggi verkefni fyrir nemendur sína eða hefji verkefnavinnu eftir atvikum í hverjum hópi.



Að því loknu munu kennarar ganga til fundar „vegna þeirrar grafalvarlegu stöðu sem við blasir í framhaldsskólum landsins“, eins og stendur í fundarboði. Fundað er á sama tíma í öllum framhaldsskólum landsins, klukkan korter yfir ellefu. 

Á dagskrá eru umræður um stöðu samninga- og kjaramála og næstu skref. Gert er ráð fyrir að samþykkt verði ályktun sem send verði til stjórnvalda og fjölmiðla í lok fundar.