Kona Stinky endurheimt eftir þrjá mánuði

Gísli Freyr Sverrisson endurheimti fokdýrt keppnishjól sitt með hjálp lögreglumanna sem biðu í launsátri á meðan hann fór og hitti þjófinn, eftir að því var stolið af sjöundu hæð í blokk í Engihjallanum.

„Þetta byrjaði á því að ég skildi hjólið mitt eftir á gangi á 7. hæð í Engihjallanum því ég nennti ekki a þeirri sekúndu að fara inn með hjólið," segir Gísli Freyr Sverrisson. Gísli er bróðir Jóns Margeirs Sverrissonar, sundkappa.

„Pabbi fer síðan og skutlar bróður mínum á sundæfingu og þegar hann kemur heim spyr hann mig: „Hvar er hjólið þitt?" Ég fór bara beint út að leita að því. Það var snjókoma í gangi þannig að ég gat elt förin eftir hjólið aftur fyrir blokkina. Þaðan lágu þau að Digranesskóla en vegna þess að það var nýbúið að ryðja hurfu förin og ég gat ekki elt þau lengra," segir Gísli.

Löggan beið í launsátri á meðan þeir hittu þjófinn

„Ég auglýsti á Facebook að hjólinu mínu hefði verið stolið, en það skilaði engu. Þetta hjól kostar nýtt hálfa milljón og ég er búinn að eyða miklum peningum í það, þannig að þetta var ótrúlega leiðinlegt," segir Gísli.

„Þrem mánuðum seinna hringir félagi minn í mig og segir að sér hafi verið boðið Kona Stinky 2008 árgerð í skiptum fyrir vespuna sína. Ég veit að það eru bara til þrjú svona hjól á landinu og annar félagi minn á eitt þeirra. Ég hringdi í hann og hann sagði að hann væri ekki að reyna að selja sitt, svo að mig grunaði að þetta væri mitt hjól," segir Gísli.

„Vinur minn þóttist hafa áhuga á að fá hjólið í skiptum fyrir vespuna og fékk senda mynd af því. Þá var ég viss um að þetta væri mitt hjól og lét lögregluna vita af því. Síðan fórum við bara að skoða hjólið og við vorum búnir að hitta lögguna. Þeir biðu bara í rólegheitunum í nágrenninu og eftir að hafa spjallað við seljandann fór einn okkar út og veifaði til löggunar sem kom bara. Þjófurinn reyndi fyrst að ljúga sig út úr þessu, en ég er allavega búinn að fá hjólið," segir Gísli Freyr Sverrisson.