Sinnti tígrisdýrahvolpum í munkahofi í Taílandi

Ása Björg ræktar ketti en ákvað að kynnast tígrisdýrum í Taílandi í sjálfboðavinnu. Hún fékk að huga að litlum hvolpum sem mæðurnar höfðu afneitað.

Eftir að hafa lesið grein í Fréttablaðinu um stúlkur sem unnu með tígrisdýrum í Taílandi ákvað Ása Björg Ásgeirsdóttir að láta drauminn rætast og sækja um sjálfboðavinnu í gegnum Tigertemple.org hjá Forest Monastery skammt frá bænum Kanchanaburi í Taílandi.

Í mars fékk hún frí úr vinnunni hjá Reiknistofu bankanna, pantaði sér flugmiða og hélt á vit ævintýra á meðan kærastinn beið heima.

„Þetta var reynsla sem ég hefði alls ekki viljað missa af og get vel hugsað mér að fara þangað aftur. Þetta var bara ótrúlegt að geta verið svona nálægt þessum dýrum og fá að sinna þeim og knúsa þau,“ segir Ása sem hefur mikla ástríðu fyrir köttum.

Saga tígrisdýranna í munkahofinu Forest Monastery hófst fyrir fimmtán árum þegar bæjarbúar stálu tveimur tígrishvolpum frá uppstoppara og földu hjá munkunum til að bjarga lífi þeirra.

Í dag eru í kringum 140 tígrisdýr í hofinu en kven- og karldýrin fá að vera saman öllum stundum. Dýrunum er sinnt vel en þau fá soðinn kjúkling daglega ásamt vítamínum og fæðubótarefnum.

„Við fengum að huga að litlu hvolpunum sem mæðurnar hafa afneitað því það virðist vanta móðureðli í tígrisdýramæðurnar þegar þær eru í haldi,“ segir Ása Björg.

Mánaðardvölin leið hratt þar sem hún hugleiddi með munkunum á kvöldin og sinnti tígrisdýrahvolpum á daginn. „Þetta var allt voðalega notalegt þótt ég hafi fengið töluverða marbletti eftir hvolpana. Þeir eru bara eins og litlir krakkar og þurfa að setja allt upp í munninn – en hafa aðeins sterkara bit,“ segir hún hlæjandi.