Samkeppniseftirlitið segir nýja rannsókn á Vífilfelli koma til greina

Samkeppniseftirlitið segir koma til greina að hefja nýja rannsókn á Vífilfelli. Þetta kemur fram í yfirlýsingu eftirlitsins. Hæstiréttur staðfesti í dag ákvörðun héraðsdóms um að snúa við úrskurði áfrýjunarnefndar samkeppnismála sem hafði komist að þeirri niðurstöðu að Vífilfell hafi brotið gegn samkeppnislögum.

Íslenska ríkið þarf að greiða fyrirtækinu til baka 80 milljónir króna auk málskostnaðar fyrir Hæstarétti. Samkeppniseftirlitið hafði sektað fyrirtækið vegna samninga Vífilfells við birgja þar sem viðsemjendur skuldbundu sig til að bjóða eingöngu upp á vörur frá Vífilfelli en auk þess skoðaði eftirlitið ákvæði samninga sem virtust viðhalda tryggð endursöluaðila við vörur fyrirtækisins.

Tekist var á um hvort að Samkeppniseftirlitið hafi kannað með fullnægjandi hætti hvort að Vífilfell hafi verið með markaðsráðandi stöðu, líkt og eftirlitið taldi.

Aðeins var horft á gosdrykkjamarkað en Vífilfell taldi að markaðurinn væri víðtækari en Samkeppniseftirlitið og áfrýjunarnefnd samkeppnismála taldi og að hann taki til allra óáfengra drykkja eins og mjólkurdrykkja, kaffis, ávaxtasafa, orkudrykkja auk gosdrykkja.

Hæstiréttur taldi ekki nógu skýrt hvort að kolsýrðir vatnsdrykkir og gosdrykkir væru á sama markaði og tók þannig undir þau sjónarmið að ekki hafi verið nógu skýrt hvort Vífilfell hafi í raun verið með markaðsráðandi stöðu.

„Mikilvægt er fyrir þróun samkeppni á drykkjarvörumörkuðum að úr því fáist skorið hvort þeir starfshættir sem um er deilt í málinu standist samkeppnislög,“ segir í yfirlýsingu frá eftirlitinu. „Þar sem efnisdómur fékkst ekki í málinu liggur fyrir Samkeppniseftirlitinu að taka ákvörðun um hvernig við því verði brugðist.“