Geimferðastofnun mælir íslenska jökla

Vísindamenn frá Bandarísku geimferðastofnuninni (NASA) og Caltech-háskóla í Kaliforníu þróa nú nýja tækni til ratsjármælinga á hreyfingu jökla í samvinnu við jöklafræðinga Háskóla Íslands að því er segir í tilkynningu skólans.

Meðal annars á að nýta tækin til mælinga á hreyfingu jökla hélendis. „Flogið verður yfir Langjökul og Hofsjökul með nokkurra klukkustunda millibili í nokkra daga og við það fæst samfelld mynd af hreyfingu jöklanna. Á sama tíma verður komið fyrir GPS-landmælingatækjum sem mæla mjög nákvæmlega færslur í stökum punktum á jöklunum.“