Heiðra formæður íslenskra höggmynda

Skipulagsráð Reykjavíkurborgar hefur samþykkt staðsetningu höggmyndagarðs fyrir „formæður“ íslenskrar höggmyndalistar hjá japönsku kirsjuberjatrjánum í suðvestuhorni Hljómskálagarðsins.

Vísað er til þess í kynningu á höggmyndagarðinum að ríki og borg reki listasöfn til minningar um „feður“ íslenskrar höggmyndalistar, þá Einar Jónsson, Ásmund Sveinsson og Sigurjón Ólafsson. Konur hafi einnig lagt mikið til höggmyndalistar á Íslandi og því sé lagt til að setja upp garð þeim til heiðurs.

Úthýst og sprengdar í loft upp

Gert er ráð fyrir verkum sex listakvenna í garðinum. Þær eru Gunnfríður Jónsdóttir (1889 - 1968), Nína Sæmundson (1892 - 1962), Tove Ólafsson (1909 - 1992), Þorbjörg Pálsdóttir (1919- 2009), Ólaf Pálsdóttir (1920) og Gerður Helgadóttir (1928 - 1975).

„Í sögu Tjarnarsvæðisins má finna dæmi um hversu erfitt konur áttu uppdráttar í íslenskri myndlist. Hafmeyja Nínu Sæmundsson sem var sett upp í Tjörninni var sprengd í loft upp 1959. Piltur og stúlka Tóve Ólafssonar var gefin Þjóðleikhúsinu við opnun hússins 1950 en síðan úthýst og var þá færð borginni til varðveislu og komið fyrir í Hljómskálagarðinum.“ segir í kynningu á verkefninu.

Ólíkur ferill frumkvöðla á mótunarskeiði

Í umsögn Hafþórs Yngvasonar, forstöðumanns Listasafns Reykjavíkur, segir að mikilvægt sé að gestir garðsins skilji sérkenni myndhöggvaranna og ástæður þess að að sýna verk þeirra saman.

„Ferill þeirra er ólíkur enda aðstæður þeirra mismunandi og eru verkin valin til að sýna breiddina í listsköpun þeirri. Það sem listakonurnar eiga sameiginlegt er að vera frumkvöðlar á mótunarskeiði myndlistar á Íslandi og að hafa brotist til mennta og haft þann styrk að stunda list sína við erfiðar aðstæður,“ segir Hafþór í umsögninni.

Gjörningar í garðinum á baráttudegi kvenna

Gert er ráð fyrir gagnvirkri vefsíðu með upplýsingum sem gestir geta nýtt sér á staðnum. „Lagt er til að samtímalistamenn verði fengnir til að hanna merkingar á staðnum og yfirbragð vefsíðunnar með það í huga að gera hana listræna og lifandi. Einnig verði á hverju ári, á alþjóðlegum baráttudegi kvenna 8. mars, fengnir listamenn til að gera gjörninga í garðinum sjálfum til heiðurs myndhöggvurunum og til að vekja athygli á baráttu þeirra,“ segir forstöðumaður Listasafns Reykjavíkur.

Skipulagsráð hefur nú samþykkt staðsetningu höggmyndagarðsins og kemur málið nú til kasta borgarráðs.